Memleket basshysy úılerdi gazǵa qosýdyń qymbattyǵyn synǵa aldy

ASTANA. QazAqparat – Elordadaǵy turǵyn úılerdi gaz júıesine qosý jumystaryn tezdetý kerek. Astanany damytý máseleleri jónindegi keńes otyrysynda Memleket basshysy Qasym-Jomart Toqaev osyndaı tapsyrma berdi, dep habarlaıdy QazAqparat tilshisi.

Prezıdent mańyzdy mindettiń biri turaqty elektr energııasymen qamtamasyz etýge qatysty bolyp turǵanyn aıtty. Osy oraıda ákimdikke jalpy qýattylyǵy 700 megavatt bolatyn qosalqy stansalardyń qurylysyn jedeldetý tapsyryldy.

Sonymen qatar Qasym-Jomart Toqaev gaz jelilerin tartý jumystaryna da toqtaldy.

Memleket basshysy 2019 jyly «Saryarqa» gaz qubyrynyń birinshi kezegi aıaqtalǵanyn atap óte kele, ákimdikke 300 myńnan astam adam turatyn turǵyn alabyna gaz tartý mindeti júktelgenin aıtty.

Bul turǵyda Prezıdent gaz júıesine qosý jumystarynyń baıaý qarqynyna baılanysty ekologııa nasharlap jatqanyn jetkizdi. Aıazdy kúnderi kómirmen jaǵylatyn peshten shyqqan tútin qalanyń aýmaǵyna jaıylady.

«Buǵan deıin elorda aýmaǵyna tolyqtaı gaz tartý jumysyn aıaqtaýdy birneshe ret tapsyrǵan edim. Biraq ony oryndaý merzimi únemi keıinge shegerilip keldi. Sondyqtan, bul jaǵdaıdy tez arada ózgertý kerek. Úkimet pen ákimdik osy baǵyttaǵy jumysty kúsheıtip, belgilengen merziminde aıaqtaýy qajet. Sonymen berge, Úkimet «Samuryq-Qazyna» qorymen birlesip, elordaǵa qajet kólemdegi gazdy qamtamasyz etý máselesin sheshýi qajet», - dedi Qasym-Jomart Toqaev.

Budan bólek Prezıdent turǵyndardyń úılerine gaz tartý quny qymbatqa túsip jatqanyn aıtty.

«Bul qyzmet úshin eki mıllıon teńgege deıin suraıdy eken. Osyndaı jaǵdaı barlyq aımaqtarda da qalyptasqan. QR Básekelestikti qorǵaý jáne damytý agenttigi Úkimetpen birlese otyryp, turǵyndardyń úılerin gaz júıesine qosýǵa baǵa belgileýdiń ashyq ári túsinikti bolýyn qamtamasyz etý boıynsha naqty usynys engizýdi tapsyramyn», - dedi Memleket basshysy.