Memleket basshysy: Úsh oblysqa gaz tartylady

NUR-SULTAN. QazAqparat – Kelesi jyly Qaraǵandy, Aqmola jáne Soltústik Qazaqstan oblystaryna gaz tartý jumystary bastalady, dep habarlaıdy QazAqparat tilshisi.

«Túrli óńirler turǵyndarynyń taza aýyzsý men tabıǵı gazǵa, kólik ınfraqurylymyna túrli deńgeıde qoly jetip otyrǵany anyq. Osy teńsizdikti retteý boıynsha jumysty qarqyndatý qajet. Elbasynyń tapsyrmasy boıynsha «Saryarqa» gaz qubyry magıstraliniń birinshi kezeńi aıaqtalyp keledi. Kelesi jyldan bastap Nur-Sultan qalasy men Qaraǵandy oblysynda, odan keıin Aqmola jáne Soltústik Qazaqstan oblystarynda taratý jelileriniń qurylysyn bastaý josparlanǵan. Bul maqsatqa memleket 56 mlrd teńge bóledi. Nátıjesinde 2 mln 700 myńnan astam adam tabıǵı gazǵa qol jetkizedi», - dedi Qasym-Jomart Toqaev Qazaqstan halqyna Joldaýynda.