Memleket basshysy: Ultymyzdyń tarıhı sana-sezimin jańǵyrtý óte mańyzdy
«Ekinshi másele. Ultymyzdyń tarıhı sana-sezimin jańǵyrtý óte mańyzdy. Damyǵan memlekettiń bári tolyq zerttelgen tól shejiresin dáripteýge aıryqsha mán beredi. Bul iste el tarıhynyń kóp tomdyq jınaǵy basty ról atqarady. Qazaqstan tarıhynyń jańa ǵylymı ustanymdarǵa saı ázirlengen kóp tomdyq jınaǵy áli kúnge deıin jaryqqa shyqqan joq. Ókinishke qaraı, strategııalyq mańyzy bar osy másele táýelsizdik jyldarynda tolyq sheshimin tappady», - dedi Memleket basshysy.
Sondyqtan, Prezıdent «Táýelsizdik bárinen qymbat» atty maqalasynda osyǵan arnaıy toqtalǵanyn atap ótti.
«Qazaqstannyń akademııalyq úlgidegi jańa tarıhyn jazý týraly bastama kóterdim. Bul jumysqa elimizdiń jáne sheteldiń bir top ǵalymdary jumyla kiristi. Ejelgi zamannan búginge deıingi aralyqty qamtıtyn jeti tomdyq jınaqty ázirleý úshin biraz sharýa atqaryldy. Jınalǵan materıalǵa endi stılıstıkalyq jáne ǵylymı redaktsııa jasalýy kerek. Sondaı-aq, jınaqty biryńǵaı úlgide bezendirgen jón. Eńbekte osyǵan deıin jiberilgen tujyrymdamalyq qatelikter men kemshilikter qaıtalanbaýy qajet. Oǵan sońǵy kezde ashylǵan tarıhı jańalyqtar túgel engizilýi kerek. Qarama-qaıshy málimetter bolmaýǵa tıis», - dedi Qasym-Jomart Toqaev.