Memleket basshysy Ulttyq ınfraqurylym josparyn qabyldaýdy usyndy
«Infraqurylymdy damytýǵa qatysty ustanymdardy qaıta qaraý qajet. Bıylǵy qystyń qalaı ótkenin barshańyz bilesizder. Qystyń kózi qyraýda birqatar aımaqta qalalar men eldi mekender jylýsyz qaldy. Ábden tozǵan energetıka ınfraqurylymy áreń jumys istep tur.
Meniń tapsyrmammen elektr energetıkasy naryǵyn damytýdyń jańa úlgisi daıyndalyp jatyr. Sol arqyly osy salaǵa qosymsha ınvestıtsııa tartý kózdelip otyr. Sondaı-aq, bul qujat osy salanyń barynsha ashyq bolýyn qamtamasyz etpek», - degen Memleket basshysy Májilistiń qaraýynda elektr energetıkasyna qatysty úsh zań jobasy jatqanyn eske saldy.
«Depýtattyq korpýs zańnamadaǵy tıisti ózgertýlerdi shuǵyl túrde qarap, qabyldaýǵa tıis. Kommýnaldyq jelilerdiń ábden tozýy saldarynan barlyq óńirde derlik qaıta-qaıta apat bolyp jatyr. Kóptegen qalada jol, elektr taratý jelisi, gaz qubyry sekildi negizgi ınfraqurylymdardyń tapshylyǵy qatty baıqalady.Biz elimizdiń ınfraqurylymdyq qýatyn qalyptastyrýymyz qajet. Sondyqtan, men Ulttyq ınfraqurylym josparyn qabyldaýdy usynamyn», - dedi Qasym-Jomart Toqaev.
Prezıdenttiń aıtýynsha, qujatta osy saladaǵy basty máseleler ashyq kórsetilýge tıis. Sonymen birge, 2029 jylǵa deıin iske asyrylatyn negizgi jobalar qamtylýy qajet.
Aıta keteıik, elordada VIII saılanǵan Qazaqstan Respýblıkasy Parlamentiniń birinshi sessııasy ótip jatyr. Jıynǵa Memleket basshysy Qasym-Jomart Toqaev qatysýda.