Memleket basshysy tapsyrmalarynyń qalaı oryndalyp jatqany týraly aıtty

TÚRKІSTAN. QazAqparat - Qasym-Jomart Toqaev Túrkistan jurtshylyǵymen kezdesýde «Ulttyq qor - balalarǵa» jobasy týraly áńgimeledi, dep habarlaıdy QazAqparat.

«Men «Ulttyq qor – balalarǵa» atty jańa baǵdarlama qabyldaýdy usyndym. Biz qordyń jyl saıynǵy ınvestıtsııalyq tabysynyń teń jartysyn balalardyń esepshotyna aýdaratyn bolamyz. Bul qarjyny olar kámelet jasyna tolǵannan keıin baspanaǵa nemese bilim alýǵa jumsaı alady. Osy sheshim ulttyq tabysty ádil bólý qaǵıdatyna saı keledi dep esepteımin. Atalǵan sharalardyń bári óskeleń urpaqtyń bolashaǵyna arnalady», - dedi Prezıdent.

Ol elimizdiń qazir Ádiletti Qazaqstandy qurýǵa kiriskenin alǵa tartty. Sońǵy jyldary túbegeıli ózgerister jasalyp, elimizdi jańǵyrtý sharalary qolǵa alyndy. Maýsym aıynda ótken referendým halyqtyń bul bastamalardy qoldaıtynyn kórsetti.

«Saıası reformalar elimizde «kúshti Prezıdent – yqpaldy Parlament – esep beretin Úkimet» qaǵıdatyn ornyqtyrdy. Bul - Prezıdenttik Respýblıka bolamyz degen sóz. Rasynda, el basqaratyn Prezıdent quzyrly, kúshti bolýy kerek. Áıtpese, keıbir basqa elderdegi sııaqty tártipsizdikke ushyraýymyz múmkin. Al, ondaı jaǵdaı halqymyzǵa qasiret ákeledi.

Budan bylaı Májilis pen máslıhattar aralas júıe boıynsha jasaqtalady. Bılik tarmaqtary arasynda tepe-teńdik ornatý úshin naqty sharalar qabyldandy. Prezıdenttiń birqatar ókilettigi Parlamentke berildi. Óńir basshylary balamaly jolmen tańdalatyn boldy. Aýyl ákimderin tikeleı saılaý tásili engizildi», - dep atap ótti Memleket basshysy.