Memleket basshysy syrt elde júrgen qandas baýyrlarǵa alǵys aıtty
«Ardaqty aǵaıyn, qurmetti baýyrlar! Dúnıejúzi qazaqtarynyń besinshi quryltaıyna kelgen barshańyzǵa qazaqtyń qasterli atajurty - Qazaq Eline, onyń bas ordasy - Astanamyzǵa qosh keldińizder deımin! Jańa aıtyp ketkendeı, alqaly jıynǵa alty qurlyqqa jaıylyp ketken 350-den astam qandas delegattarymyz kelip otyr. Qaıda júrse de, qazaqtyń tarıhı Otany bireý ǵana, ol - Qazaqstan! Atamekenimiz jalǵyz! Ol - bir ýys topyraǵyna deıin qasıetti bizdiń Uly dala Qazaq Elimiz!», - dedi Elbasy Quryltaıdyń ashylý saltanatynda.
«Búgingi basqosýǵa meniń qolymda bar málimet boıynsha, jas býyn ókilderi qatysyp otyr. Sebebi jas urpaq túbi, tarıhy, negizi - qazaq elinde ekenin eshqashan umytpaıdy. Olardyń ata-analaryna óte úlken rahmetimizdi aıtýymyz kerek. Olar tamyryn tarıhı Otanynda jaıýdy oılaıdy. Týǵan elmen baılanysyn nyǵaıtyp, ata saltyn saqtap, ana tilin umytpaýǵa tyrysady», - dedi Prezıdent.
Aıta keteıik, Astana qalasynda Dúnıejúzi qazaqtarynyń V Quryltaıy óz jumysyn bastaǵan bolatyn. Quryltaı jumysyna barlyǵy 800 delegat pen qonaq qatysýda, onyń 350 adamy alys jáne jaqyn shetelderdegi álemniń 39 elinen keldi. Bul - ǵylymı-shyǵarmashylyq jáne pedogogıkalyq zııalylar ókilderi, bıznes, sport, buqaralyq aqparat quraldary salalarynyń mamandary, memlekettik jáne qoǵamdyq uıymdardyń qyzmetkerleri. Quryltaı delegattary men qonaqtarynyń 80 paıyzy mundaı is-sharaǵa alǵash ret qatysýda.
Dúnıejúzi qazaqtarynyń V Quryltaıynyń saltanatty ashylý rásimine Qazaqstan Respýblıkasynyń Prezıdenti N.Á. Nazarbaev, QR Parlamentiniń Senat jáne Májilis depýtattary, mınıstrlik pen vedomstvalar basshylary, túrli partııalardyń, qoǵamdyq qozǵalystardyń kóshbasshylary, Qazaqstandaǵy ulttyq-mádenı ortalyqtardyń basshylary keldi.
Jospar boıynsha, Quryltaı aıasynda Ulttyq akademııalyq kitaphanada belgili dintanýshy-ǵalymnyń 100 jyldyǵyna arnalǵan «Halıfa Altaı jáne tarıhtyń oralýy» atty halyqaralyq ǵylymı-tájirıbelik konferentsııa ótedi.
Din isteri jáne azamattyq qoǵam, Bilim jáne ǵylym, Aqparat jáne kommýnıkatsııalar, Mádenıet jáne sport, Densaýlyq saqtaý mınıstrlikteri Quryltaıdyń sheteldik qonaqtarymen «dóńgelek ústel» otyrysyn ótkizedi.
Quryltaı delegattary men qonaqtary «EKSPO-2017» halyqaralyq kórmesimen tanysady, etnoaýyldy aralaıdy jáne «Astana Opera» memlekettik opera jáne balet teatrynda ulttyq mýzykamyzdyń altyn qoryna kirgen Evgenıı Brýsılovskıdiń «Qyz Jibek» operasyn tamashalaıdy.
Dúnıejúzi qazaqtarynyń quryltaıynyń baspasóz ortalyǵynda 150 otandyq jáne sheteldiń BAQ ókilderi aqparat taratýda.
1992 jyldan beri ótkizilip kele jatqan Quryltaı dúnıejúziniń túkpir-túkpirinde turatyn etnıkalyq qazaqtardyń kezdesý orny ári biregeı suqbat alańy bolyp tabylady.