Memleket basshysy Slovenııanyń burynǵy prezıdentimen ózekti halyqaralyq máselelerdi talqylady
20:14, 11 Qarasha 2019
NUR-SULTAN. QazAqparat - Memleket basshysy Qasym-Jomart Toqaev «Astana Club» halyqaralyq pikirtalas alańyna qatysý úshin Nur-Sultan qalasyna kelgen Slovenııanyń burynǵy Prezıdenti Danılo Tıýrkpen kezdesý ótkizdi. Bul týraly Aqordanyń baspasóz qyzmetinen málim etti, dep habarlaıdy QazAqparat.
Taraptar BUU-nyń damý jaǵdaıyn talqylap, halyqaralyq kún tártibindegi ózekti máseleler jóninde pikir almasty. Barlyq salalar boıynsha, atap aıtqanda, ekonomıkalyq baǵyttaǵy kópjaqty yntymaqtastyqty nyǵaıtý qajettigi sóz boldy.
Slovenııalyq saıasatker 2020 jyldyń maýsym aıynda Nur-Sultan qalasynda ótetin Dúnıejúzilik saýda uıymynyń Mınıstrler konferentsııasy tabysty bolatynyna senim bildirip, Qazaqstannyń kópjaqty baılanystarda, onyń ishinde, saýda jáne beıbitshilik pen qaýipsizdikti qamtamasyz etý máselelerinde belsendi ról atqaratynyn jetkizdi.