Memleket basshysy sheteldik ınvestıtsııalar qaı salalarǵa tartylatynyn aıtty

NUR-SULTAN. QazAqparat – Ulttyq qoǵamdyq senim keńesiniń otyrysynda QR Prezıdenti Qasym-Jomart Toqaev ulttyq múdde memlekettik saıasattyń basty baǵyty bolatynyn aıtty, dep habarlaıdy QazAqparat tilshisi.

«Bıliktiń mindeti - dıalog arqyly memlekettik saıasattyń mindet men maqsattaryn qoǵamǵa túsindirý, salaýatty usynystar men pikirlerdi eskerý. Keıde bul isti nashar atqaryp jatamyz. Biz ulttyq, memlekettik múddeni qashan da birinshi orynǵa qoıamyz. Taǵy da shegelep aıtamyn. Jerimizdi eshkimge bermeımiz. halqymyzdyń muń-muqtajyn árqashanda eskeremiz, ol basty nazarda bolady. Sheteldik ınvestıtsııalar tek qajetti salalarǵa ǵana tartylady.

Jalpy sheteldik ınvestıtsııasyz damýshy memleketter ómir súre almaıdy. Japonııa, Malaızııa, Sıngapýr, Ońtústik Koreıa, taǵy basqa elder ınvestıtsııalardyń arqasynda jetistikke qol jetkizdi.

Sheteldik ınvestıtsııalar elderdiń qaýipsizdigine kepil bolady. Kóptegen saıasatkerlerdiń, dıplomattar men sarapshylardyń teris boljamyna qaramastan Qazaqstan memleket retinde ornyqty. Buǵan Tuńǵysh Prezıdentimiz jáne búkil halqymyz zor eńbek sińirdi. Qazir biz táýelsizdigimizdiń 30 jyldyq mejesine jaqyndap kelemiz», - dedi Qasym-Jomart Toqaev.