Memleket basshysy rezervke alynǵan jastarǵa Álıhan Bókeıhannyń qanatty sózin jadynda ustaýǵa keńes berdi

NUR-SULTAN. QazAqparat - Prezıdenttik kadr rezervine kirgender elimizdiń jastaryna ultjandylyqtyń, otanshyldyqtyń ozyq úlgisin kórsetýleri kerek. Bul týraly Aqordada Prezıdenttik kadr rezervine kirgen jastarmen kezdesýde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Bizdiń maqsatymyz sizderdi laýazymdy qyzmetke taǵaıyndaý dep oılamańyzdar. Bul eldi órkendetýge bel býǵan, sol úshin bar kúsh-jigerin jumsaıtyn azamattarǵa arnalǵan joba. Basty mindet - talantty jastardyń Qazaqstandy jańa belesterge kóterýine múmkindik berý. Eń bastysy týǵan elińdi sheksiz qadirleý, oǵan adal qyzmet etý. Tabandy eńbek etip, naqty nátıjege qol jetkizý kerek. Bul ultty jańǵyrtý úshin óte mańyzdy», - dedi Qazaqstan Prezıdenti.

Memleket basshysy búgingi kezdesýge qatysýshylar arqyly elimizde patrıottardyń jańa býyny qalyptasady dep senetindigin basa aıtty.

«Sizder egemen elimizdiń jastaryna ultjandylyqtyń, otanshyldyqtyń ozyq úlgisin kórsetýlerińiz kerek. Kezinde Alash ardaqtysy Álıhan Bókeıhan: »Ultqa qyzmet etý bilimnen emes minezden« dep aıtqan. Bul eshqashan ózektiligin joǵaltpaıtyn, ýaqyt ótken saıyn mán-mańyzy arta túsetin qanatty sóz», - dedi Qasym-Jomart Toqaev.