Memleket basshysy Polpharma SA kompanııasynyń Qazaqstandaǵy farmatsevtıka qyzmetin joǵary baǵalady

ASTANA. QazAqparat – Prezıdent Qasym-Jomart Toqaev Polpharma SA kompanııasy baqylaýshylar keńesiniń tóraǵasy Ejı Starakpen kezdesti. QazAqparat bul týraly Aqordaǵa silteme jasap habarlaıdy.

Kezdesý barysynda kompanııanyń Qazaqstandaǵy qyzmetiniń negizgi baǵyttary, sondaı-aq farmatsevtıka salasyndaǵy birlesken jobalardy júzege asyrý máseleleri talqylandy. Prezıdentke Shymkent qalasynda júrgizilip jatqan iri ǵylymı-zertteý ortalyǵy men zerthana qurylysynyń barysy jóninde málimet berildi. Ortalyqta ozyq álemdik talaptarǵa saı keletin tolyq óndiristik tsıkl iske qosylady.

Qasym-Jomart Toqaev kompanııa basshylyǵynyń Qazaqstandaǵy farmatsevtıka ónerkásibin damytý qyzmetine joǵary baǵa berdi. Sonymen qatar Prezıdent otandyq densaýlyq saqtaý salasynyń odan ári damýyn qamtamasyz etý úshin joǵary óndiristik standarttardy saqtaý mańyzdy ekenin atap ótti.