Memleket basshysy «Nur Otan» ataýyna qatysty birneshe usynys bolǵanyn aıtty

NUR-SULTAN. QazAqparat – QR Prezıdenti Qasym-Jomart Toqaev «Nur Otan» partııasynyń ataýyna baılanysty pikirtalasqa qatysqanyn aıtty, dep habarlaıdy QazAqparat tilshisi.

«Partııa barlyq reformaǵa uıytqy bolýǵa tıis. Ol úshin ózgeristi aldymen ózimizden bastaýymyz kerek. Sondyqtan búgingi kúntártibindegi negizgi másele - partııany jańǵyrtý. Zaman, qoǵam, adam ózgerip jatqanda partııanyń ózgerýi zańdylyq. Bul - ýaqyt talaby. Osyǵan oraı jańa ǵana aıtylǵandaı, saıası uıymnyń ataýyn «Amanat» dep ózgertý usynyldy. Jasyratyn eshteńe joq, men de bul máselege baılanysty pikirtalasqa qatystym. Birneshe usynys boldy. Sonyń ishinen «Amanat» degen ataýǵa toqtaldyq. Bul elimiz úshin de, ultymyz úshin de aıryqsha máni bar kıeli uǵym», - dedi Memleket basshysy «Nur Otan» partııasynyń kezekten tys sezinde.

QR Prezıdentiniń aıtýynsha, egemendimiz, eldigimiz ben birligimiz, keń baıtaq jerimiz bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek.

«Memlekettilik, dástúr jalǵastyǵy, urpaq sabaqtastyǵy degenimiz mine osy. Halqymyz eshqashan amanatqa qııanat jasamaǵan. Partııa bul qaǵıdatty berik ustanady», - dedi Qasym-Jomart Toqaev.