Memleket basshysy: Lobbıstik qyzmetti zańmen retteý jolyn zertteý kerek

ASTANA. QazAqparat – Memleket basshysy lobbıstik qyzmetti zańmen retteýdiń jáne oǵan baqylaý jasaýdyń halyqaralyq tájirıbesin zertteý kerektigi týraly aıtty, dep habarlaıdy QazAqparat tilshisi.

«Taǵy bir ózekti máselege nazar aýdarǵym keledi. Zańdar men túrli erejelerdi ázirlegen kezde qarjy-ónerkásip toptary, iri bıznes ókilderi sheshim qabyldaýǵa zor yqpal etedi. Ashyǵyn aıtsaq, bul barlyq elge, tipti damyǵan memleketterge tán jaǵdaı. Biraq, osy úderisti qoǵamnan jasyrmaı, zańmen retteý kerek, áıtpese, jemqorlyq beleń alady», - dedi Qasym-Jomart Toqaev Parlamenttiń VIII shaqyrylymynyń birinshi sessııasynda.

«Órkenıetti elderde saıasat jabyq esik jaǵdaıynda astyrtyn jasalmaıdy. Sondyqtan, lobbıstik qyzmetti zańmen retteýdiń jáne oǵan baqylaý jasaýdyń halyqaralyq tájirıbesin zertteý kerek», - dedi Prezıdent.

Buǵan deıin Memleket basshysy ekonomıkamyzdyń áli kúnge deıin paıdaly qazbalarǵa táýeldi bolyp otyrǵanyn aıtqan edi.