Memleket basshysy Qostanaı oblysynda órt sóndirý jumysynyń barysymen tanysty

NUR-SULTAN. QazAqparat - Búgin Memleket basshysy Qasym-Jomart Toqaev Qostanaı oblysyndaǵy órtti sóndirý jumystaryn jeke baqylaý úshin jumys saparymen bardy.

Bul týraly óziniń Facebook paraqshasyna QR Prezıdentiniń baspasóz hatshysy Rýslan Jeldibaı jazdy, dep habarlaıdy QazAqparat.

Baspasóz hatshysynyń habarlaýynsha, aldymen Prezıdent Áýlıekól aýdanyndaǵy aýmaqty tikushaqpen aralap shyqty. Keıin shuǵyl áreket etý shtabynyń otyrysyn ótkizdi. Sol jerde jaýapty vedomstvo basshylaryna órtti jedel aýyzdyqtaý boıynsha naqty tapsyrmalar berdi.

Jalpy, zardap shekken aýmaqtyń basym bóliginde órt sóndirildi. Tilsiz jaýmen betpe-bet kelgen halyq qaýipsiz jerge kóshirildi. Prezıdent osy azamattarmen kezdeskende búkil shyǵyndary (mal-múlki, úı, jıhazy t.b.) tolyq óteletinin, aldaǵy 2-3 aıda jańa úıler salynatynyn aıtyp, kóńili kúpti otyrǵan jurtqa basý aıtty.

Budan bólek, Qasym-Jomart Toqaev órt sóndirýshilermen kezdesti. Alapat alaýmen kúresken sarbazdarǵa alǵysyn aıtyp, olardy nagradalarǵa usynyp, qarjylaı syılyqaqymen marapattaıtynyn jetkizdi.

Sondaı-aq mınıstr Ilınge órt sóndirýshilerdiń áleýmettik jaǵdaıyn, baspana máselesin, sapaly kadr daıyndaý isin sheshý boıynsha tapsyrmalar berdi. Sebebi órt sóndirýshilerdiń úı, jalaqy syndy jeke máseleleriniń tolyq sheshilmeýi, Kókshetaýdaǵy órt sóndirýshilerdi daıarlaıtyn oqý ornynda qarapaıym jataqhana joqtyǵy bul salaǵa syn ekenin aıtty.

Sapar sońynda eriktilermen de jolyqty. Syn sátte shet qalmaı, qol ushyn bergen azamattarǵa «Sizder naǵyz patrıotsyzdar, sizderdi maqtan tutamyn» dep alǵysyn aıtty.

«Qaterli qaýip kelgende zardap shekken azamattarymyzǵa elimizdiń ár aımaǵynan gýmanıtarlyq, qarjylaı kómek kórsetip jatqan halqymyz óziniń biriligin kórsete bildi»,-delingen habarlamada.