Memleket basshysy qoǵamdy tolǵandyrǵan ózekti máselelerdiń ońtaıly sheshimderin kórsetti -senator
«Ulttyq qoǵamdyq senim keńesiniń jumysy kúnnen kúnge jandanyp kele jatyr dep aıtýǵa bolady. Birinshi otyrys pen ekinshisiniń arasynda qoǵamdyq keńestiń kóptegen músheleri Prezıdenttiń qabyldaýynda boldy. Ekinshiden, Memleket basshysy kóptegen qoǵamdyq uıymdar men saıası partııalardyń basshylarymen, sarapshylarmen kezdesti. Sebebi birinshi otyrysta aıtylǵan kóptegen máselelerdi Qasym-Jomart Kemeluly tıisti mamandarmen jáne sarapshylarmen, saıasattanýshylarmen, Ulttyq keńes múshelerimen birlese otyryp qarastyryp, naqty bir sheshimge kelý úshin jaǵdaılar jasady dep aıtýǵa bolady», - dedi Á. Bektaev.
Osy oraıda senator 20 jeltoqsanda ótken Ulttyq keńestiń ekinshi otyrysynda Prezıdent naqty ári saıası mańyzy bar tarıhı usynystardy jarııa etkenin atap ótti.
«Memleket basshysy qoǵamdaǵy saıası reformany jandandyrý, demokratııalyq prıntsıpterdi tereńdete túsý, sondaı-aq qoǵamnyń arasyndaǵy áleýmettik-saıası, áleýmettik-ekonomıkalyq máseleler turǵysynda jurtshylyqty tolǵandyryp júrgen kóptegen suraqtarǵa jaýap berdi. Qazirgi ýaqytta Ulttyq keńestiń óziniń jumysy, óziniń orny bizdiń halqymyzdyń oı-pikirinde de, qoǵamymyzda da naqty oryn ala bastady. Búgingi tańda Prezıdentke de, Memleket basshysy qurý týraly bastama kótergen osy Ulttyq qoǵamdyq senim keńesine de el halqynyń arasynda úlken senim bar ekenin aıtqym keledi. Sebebi bul keńeste shynynda da qoǵamda aıtylyp júrgen, qazirgi ýaqytta sheshimin tabýdy kútip turǵan kóptegen máselelerdiń kóterilip jatqandyǵyn biz kórip otyrmyz», - dedi Álı Bektaev.