Memleket basshysy Kishi Araldyń taǵdyryna alańdaýshylyq bildirdi

QYZYLORDA. QazAqparat - Prezıdent Qasym-Jomart Toqaev Úkimet pen Qyzylorda oblysynyń ákimdigine Kishi Araldan aıyrylyp qalmaý sharalaryn qolǵa alýdy tapsyrdy. Bul týraly QazAqparat Aqordanyń Twitter-degi akkaýntyna silteme jasap habarlaıdy.

«Halyq Aral taǵdyryna alańdaıdy. Elbasynyń bastamasy boıynsha «Syrdarııa arnasyn retteý jáne Aral teńiziniń soltústik bóligin saqtap qalý» jobasy iske asyrylýda. Osy jobanyń jáne Kókaral bógetiniń arqasynda Kishi Araldaǵy sý qalpyna keldi», - dedi Q.Toqaev Qyzylorda óńiriniń jurtshylyǵymen kezdesý barysynda.

Bul rette, Memleket basshysy Kishi Araldyń aldaǵy taǵdyryna alańdaýshylyq bildirdi.

«Máseleler munymen shektelmeıdi. Kókaral bógetiniń tómengi jaǵyn Syrdarııa aǵyny buzyp jatyr. Dereý qolǵa almasaq, Kishi Araldan aıyrylyp qalýymyz múmkin. Osy ýaqytqa deıin jınalǵan 27 mlrd tekshe metr sý zaıa ketpeýi kerek. Úkimet pen ákimdikke sharalar qabyldaýdy tapsyramyn», - dedi Prezıdent.

Sondaı-aq Q.Toqaev aýyldyq jerlerdegi ınfraqurylymdy jańǵyrtý máselesine nazar aýdardy. «Jergilikti joldar, sý qubyrlary, elektr jelileri, mádenı-sporttyq keshender - barlyǵy jańarýy qajet. Atalǵan baǵytta oblys basshylyǵy joba josparlaryn daıyndaýy tıis», - dedi ol.

Al bıznesti qoldaý sharalaryna qatysty aıta otyryp: «Kásipkerlerdi odan ári demeý úshin jańa kásiporyndarǵa 3 jyldyq ınvestıtsııalyq salyq nesıelerin usynamyz. Bul bastama olarǵa naryqta ornyǵyp, bıznesiniń irgesin nyǵaıtýǵa múmkindik beredi», - dedi.

Eske salaıyq, búgin Memleket basshysy jumys saparymen Qyzylorda oblysyna keldi. Onda oblystyq kópbeıindi balalar aýrýhanasyna jáne «Jan-Araı» JShS-ǵa bardy. Sondaı-aq qalanyń sol jaǵalaýynda paıdalanýǵa berilgen nysandarmen tanysty.