Memleket basshysy Qazaqstandy jańasha ındýstrııalandyrý jalpyulttyq telekópirine qatysady

ASTANA. QazAqparat - 25 jeltoqsanda Memleket basshysy «Qazaqstandy jańasha ındýstrııalandyrý: 2014 jyldyń jáne birinshi besjyldyqtyń qorytyndylary» atty jalpyulttyq telekópir sharasyna jáne «Altyn sapa» syılyǵynyń laýreattaryn saltanatty marapattaý rásimine qatyspaq.

Sonymen qatar búgin baǵdarlamynyń ekinshi besjyldyǵy bastaý alady dep kútilýde.

Údemeli ındýstrııalyq-ınnovatsııalyq damý memlekettik baǵdarlamasy Qazaqstannyń ónerkásiptik ekonomıkasyn ózgertýge negizdelip, salaǵa jańa serpin berýge arnalǵan. Indýstrııalandyrýdyń alǵashqy besjyldyǵy aıasynda elimizde júzdegen ónerkásipter salynyp, buryn-sońdy shyǵarylmaǵan jańa ónim óndirile bastady, jańa jumys oryndary quryldy

Jaqynda QR Prezıdenti Nursultan Nazarbaev birqatar qazaqstandyq BAQ ókilderimen suhbaty barysynda ekinshi besjyldyq ınnovatsııaǵa kóbirek baǵyttalǵanyn atap ótti. Osy oraıda kásiporyndardyń tipti jańa úlgilerin iske qosý josparlanyp otyr. Qazir álemniń 100 iri kompanııasy osy baǵdarlama aıasynda Qazaqstanǵa qarajat quıýǵa daıyn kórinedi.

QR Investıtsııalar jáne damý mınıstrliginiń málimetine qaraǵanda, bıyl Memleket basshysy taǵaıyndaǵan «Altyn sapa» syılyǵyn alýǵa qatysý úshin 293 ótinim túsken, onyń 127-si orta bıznes ókilderinen, 101-i shaǵyn kásipkerlerden, al 65-i iri bıznes ókilderinen keldi.

2014 jyly Elbasynyń jarlyǵy boıynsha konkýrsqa jeke kásipkerler de qatysa alatyn bolǵan. Sondyqtan konkýrstyń úsh atalymy boıynsha túrli sanattarǵa úsh-úshten syılyq taǵaıyndalǵan. Endi laýreattar ózderi utyp alǵan emblemany 4 jyl boıy jeke jarnamalaryna paıdalana alady.

Aıta keteıik, Indýstrııalandyrý kúni aıasynda «Paryz» bıznestiń áleýmettik jaýapkershiligi respýblıkalyq baıqaýynyń jeńimpazdaryn marapattaý rásimi ótedi. Baıqaýda «Úzdik áleýmettik jaýapty kásiporyn», «Eńbekti qorǵaý salasyndaǵy úzdik kásiporyn», «Úzdik ujymdyq shart», «Ekologııaǵa qosqan úlesi úshin» atalymdary qamtylyp otyr.

Osymen jetinshi márte ótkizilip otyrǵan baıqaýǵa qatysýǵa nıetti jeke kásipkerlik sýbektiler sanynyń artýy baıqalýda

QR Prezıdentiniń Jarlyǵymen jarııalanǵan «Paryz» bıznestiń áleýmettik jaýapkershiligi baıqaýyna bıyl qatysýǵa barlyq óńirlerden 584 ótinim berilgen. Konkýrs ótkizile bastaǵannan beri 2,5 myń shaǵyn, orta jáne iri kásiporyndar qatysty. Aǵymdaǵy jyly baıqaýǵa qatysýǵa berilgen ótinimder sany boıynsha Qostanaı oblysy kósh bastap tur.