Memleket basshysy Qazaqstan ekonomıkasynyń búgingi ahýaly týraly aıtty

ASTANA. QazAqparat - Jyl qorytyndysyna oraı otandyq BAQ ókilderine suhbat bergen Elbasy Nursultan Nazarbaev elimizdiń ekonomıkalyq ahýaly jaıynda sóz qozǵady, dep habarlaıdy QazAqparat tilshisi.

«El ishindegi ahýalǵa toqtalar bolsam, álemdik ekonomıkadaǵy óte úlken qubylmalylyqqa, sanktsııalyq teketirester men saýda soǵystaryna qaramastan, ekonomıkamyz 4 paıyzdan astam ósim kórsetti. Bul, álemdik deńgeıden, álemdik ekonomıkadan joǵary. Múmkin bizge úlken qarqynmen jyljý kerek te shyǵar. Biraq, qazirgi ómir súrip jatqan jaǵdaıymyzda bul da jaqsy», - dedi Nursultan Nazarbaev.

Elbasy búginde ınflıatsııa 5-7 paıyz dálizde turǵanyn atap ótti.

«Eldiń altyn-valıýta qory artyp, 88 mlrd dollarǵa jetti. Bul, daǵdarys  týyndaǵan jaǵdaıda memleketimizdiń turaqty qyzmetin qamtamasyz etedi. Qarańyzdarshy, úsh aı buryn munaı barreli 80 dollarǵa jýyq bolsa, qazir 60 dollardan tómen túsip ketti. Mine, osyndaı  jaǵdaıda jumys isteýge týra keledi.  Al bıýdjet túsiminiń negizi, jartysynan kóbi shıkizattan túsken qarajattan quralady», - dedi Memleket basshysy.

Nursultan Nazarbaev aǵymdaǵy jyldyń ózinde elimizde 100 jańa óndiris oshaǵy iske qosylǵanyn, al jalpy 1200 nysan jumys istep turǵanyn aıtty.

«550 myń adam jumys, jańa jumys ornyn, joǵary jalaqy tóleıtin jumys ornyn tapty.  Tolyqtaı alǵanda, ekonomıkany qalypty dep sanaýǵa bolady. Úkimet, óńirler, atqarýshy bılik jasaý kerek dúnıeniń barlyǵyn jasady»,  - dedi Nursultan Nazarbaev.