Memleket basshysy Qazaqstan agroınnovatsııalyq korporatsııasyna bardy
Prezıdentke jylyna 3 myńǵa jýyq aýyl sharýashylyǵy tehnıkasyn shyǵaratyn korporatsııanyń tehnologııalyq protsesi jáne ónim úlgileri kórsetildi.
Aýyl sharýashylyǵy tehnıkalaryn qurastyrý tsehtaryn aralap kórgennen keıin Memleket basshysyna kásiporynnyń negizgi kórsetkishteri men damý perspektıvasy jóninde málimet berildi.
Kásiporyn basshylyǵynyń málimetine sáıkes óndiris ornynda qosymsha qoıma, ákimshilik-turmystyq ǵımarat salynǵan. Eki jańa óndiris bólimshesiniń qurylysy aıaqtalýǵa jaqyn. Sondaı-aq Eýropadan, Ońtústik Koreıadan robottandyrylǵan dánekerleý, frezerleý ortalyqtary jáne stanoktar satyp alynǵan. Bul jerde traktorlar, kombaındar, ekskavatorlar, shóp shabatyn jáne jınaıtyn mashınalar, tyrmalar, tirkemeler, júk tıegishter, soqalar jáne taǵy basqa aýyl sharýashylyǵy tehnıkalary shyǵarylady. Keıingi úsh jylda 121 mıllıard teńgege 6500-den astam ónim túrlerin shyǵarǵan. Qazir korporatsııada 300-ge jýyq adam jumys isteıdi.
Qasym-Jomart Toqaev kásiporyn jumysshylarymen áńgimelesý barysynda olardyń otandyq mashına jasaý óndirisin damytýǵa qosyp jatqan úlesine rızashylyǵyn bildirip, jumystaryna tabys tiledi.
Budan keıin Aqmola oblysynyń ákimi Ermek Marjyqpaev óńirdegi mashına jasaý salasynyń jaı-kúıi týraly baıandama jasady. Onyń aıtýynsha, 5 jyl ishinde óńdeý ónerkásibi 2,6 ese, mashına jasaý 3,2 ese, aýyl sharýashylyǵy tehnıkalaryn jasaý 6,9 ese artqan. 2022 jyly bul salaǵa 3 mıllıard teńge ınvestıtsııa quıylǵan.
Prezıdent mashına jasaý kásiporyndarynyń basshylarymen de óndiristi órkendetý jóninde pikir almasyp, Úkimet tarapynan osy salaǵa qoldaý kórsetilip jatqanyn, olardyń eńbegi men sapaly ónimderiniń mańyzdy ekenin atap ótti.
Memleket basshysynyń jumys saparymen Aqmola oblysyna barǵanyn jazdyq.
Aqmola oblysynda Memleket basshysy Málik Ǵabdýllın atyndaǵy Azamattyq qorǵaý akademııasyna baryp, stýdentter aldynda sóz sóıledi.
Foto: akorda.kz