Memleket basshysy: Qazaq mádenıeti men tarıhy elimizdegi barsha ulystardyń rýhanı uıytqysyna aınaldy

ASTANA. QazAqparat - Qazaq halqynyń tarıhy tereńde jatqanyn búkil álemge kórsetýimiz kerek. Búgin Astanadaǵy Táýelsizdik saraıynda Elbasy Nursultan Nazarbaevtyń qatysýymen Qazaqstan Respýblıkasy Ata Zańynyń 20 jyldyǵyna arnalǵan «Konstıtýtsııa: birilik, turaqtylyq, órkendeý» taqyrybynda halyqaralyq ǵylymı-tájirıbelik konferentsııa jumysyn bastady.

«Eń bastysy, óship bara jatqan qazaqtyń tilin, tarıhı men mádenıetin órkendetip, órisin keńeıttik. Buryn-sońdy bolmaǵan tildiń órisi keńinen jaıylyp, mektepterimizdiń kópshiliginde, joǵary oqý oryndarynda sabaqtar qazaq tilinde ótetin boldy. Qazaq tilinde shyǵatyn basylymdar men kitaptar artyp, tarıhymyzdy tereńdetý turǵysynda álem elderinde qundy derekterdi jınap, tarıhymyzdy ornyna keltirýge múmkinshilik aldyq. Óz tilimizdi, dilimizdi, dinimizdi órkendete otyryp, biz basqalardy kemitpedik!», - dep toqtaldy Memleket basshysy. Osy oraıda Elbasy Qazaqstandaǵy barsha halyqtyń quqyqtaryna erekshe mán berilgenin, bul turǵyda elimizdiń tuǵyrlyǵy men birligi nyǵaıǵanyn atap ótti. «Qazaq mádenıeti men tarıhy elimizdegi barsha ulystardyń rýhanı uıytqysyna aınaldy. Kúlli el bolyp atap ótkeli otyrǵan Qazaq handyǵynyń 550 jyldyǵy osynyń aıqyn kórinisi. Til, tarıh jáne mádenıet úshtaǵanynyń birligi bizdiń myzǵymas rýhanı tirligimizdiń, el birliginiń negizi bolǵanyna barlyǵymyz kýá bolyp otyrmyz. Bizdiń tarıhymyzdyń tamyry tereń jatyr. Sonyń barlyǵyn biz ózimizge, urpaǵymyzǵa, búkil álemge kórsetýimiz kerek», - dedi Prezıdent.