Memleket basshysy Fraýnhofer ınstıtýtynyń ókilimen kezdesti
20:11, 06 Jeltoqsan 2019
BERLIN. QazAqparat – Memleket basshysy Qasym-Jomart Toqaev Fraýnhofer ınstıtýtynyń syrtqy baılanystar bóliminiń dırektory Iens Noıgebaýermen kezdesti, dep habarlaıdy Aqorda.
Taraptar bilim berý salasyndaǵy yntymaqtastyq máselelerin talqylady.
Qasym-Jomart Toqaev atalǵan ınstıtýttyń Qazaqstanda kásibı mamandar daıarlaý isin jańǵyrtýǵa jáne dýaldi bilim berý júıesin engizýge eleýli úles qosqanyn atap ótti. Memleket basshysynyń aıtýynsha, bizdiń el bul saladaǵy Germanııanyń tájirıbesin engizýge múddeli.
Iens Noıgebaýer Fraýnhofer ınstıtýtynyń Qazaqstanmen aradaǵy yqpaldastyqty damytýǵa daıyn ekenin jetkizdi.
Atalǵan ınstıtýt 2008 jyldan beri Nur-Sultan, Almaty, Aqtaý, Qaraǵandy jáne Óskemen qalalaryndaǵy oqý oryndarymen, ónerkásiptermen tyǵyz baılanys ornatqan.