Memleket basshysy: Eńbekpen qamtylǵandardyń 40 paıyzǵa jýyǵy «kóleńkede» qalyp qoıǵan
«Ekinshi másele – jumyspen qamtý máselesi. Biz jumyspen qamtýdyń jol kartasyn qabyldap, oǵan 1 trıllıon teńge bóldik. Bul qarjynyń 98,2 paıyzy ıgerildi. Baǵdarlama halyqty eńbekpen qamtyp, iskerlik belsendilikti qoldaý úshin mańyzdy ról atqardy. Alaıda ondaǵan jáne júzdegen myń jumys orny ashylǵany týraly aqparatty teksergende, ol zeınetaqy jáne salyq tólemderimen sáıkes kele bermeıdi. Azamattardy qaǵaz júzinde ǵana jumysqa ornalastyrý beleń alyp otyr», - dedi QR Prezıdenti.
Memleket basshysynyń atap ótýinshe, biryńǵaı aqparattyq júıege bir adam týraly málimet qaıta-qaıta engiziledi.
«Dál osyndaı 15 myń jaǵdaı tirkelgen. Jumysqa ornalasty degen adamdardyń úshten biri zeınetaqy qoryna qarjy aýdarmaǵan bolyp shyqty. Mundaı jaǵdaı ásirese Túrkistan 79 paıyz, Qyzylorda 43 paıyz jáne Jambyl oblystarynda 36 paıyz anyqtalyp otyr», - dedi Qasym-Jomart Toqaev.
Jalpy, eńbekpen qamtylǵandardyń 40 paıyzǵa jýyǵy «kóleńkede» qalyp qoıǵan. Men buǵan deıin osyndaı esepterdi avtomatty túrde qaıta tekserý tásilderin engizý týraly tapsyrma berdim. Alaıda Memlekettik kirister komıteti men Biryńǵaı jınaqtaýshy zeınetaqy qory bul tapsyrmany áli oryndaǵan joq.