Memleket basshysy ekonomıkalyq júıedegi jahandyq syn-tegeýrinderdi atady

NUR-SULTAN. QazAqparat - Adamı kapıtaldy damytý - búgingi kúnniń eń mańyzdy syn-tegeýrini. Bul týraly búgin elordada ótip jatqan Sheteldik ınvestorlar keńesiniń otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Álemdik ekonomıka ósimine qatysty boljam nasharlap bara jatyr. Ekonomıkalyq yntymaqtastyq jáne damý uıymynyń esebine sáıkes, ótken jyly álemdegi tikeleı sheteldik ınvestıtsııanyń jalpy somasy 27 paıyzǵa, ıaǵnı 1,1 trln dollarǵa deıin tómendedi», - dedi Memleket basshysy.

Degenmen, Qasym-Jomart Toqaevtyń atap ótýinshe, Qazaqstan sheteldik ınvestıtsııa tartýdy turaqty ustap qala aldy.

«Ótken jyly sheteldik ınvestıtsııanyń jalpy aǵyny 24,3 mlrd dollardy qurap, 2017 jylmen salystyrǵanda 16 paıyz ósimdi kórsetti. Munyń barlyǵy - bizdiń ónimdi kúsh-jigerimiz ben ujymdyq jumysymyzdyń arqasynda», - dedi QR Prezıdenti.

Degenmen, Memleket basshysy aldymyzda birqatar qıyndyq turǵanyn basa aıtty.

«Jahandyq eńbek naryǵynyń transformatsııasy - búgingi kúnniń eń negizgi megatrendteriniń biri sanalady jáne qoldanystaǵy júıege eń úlken syn-tegeýrin bolyp tur. Búgingi bizdiń keńesimizdiń máni - adamı kapıtaldy damytý. Adamı kapıtaldy damytý búgingi kúnniń eń mańyzdy syn-tegeýrini sanalady. Sondyqtan sarapshylar men praktıkterdiń oı-pikirlerin estý - biz úshin óte qyzyq», - dep atap ótti Q.Toqaev.