Memleket basshysy ekonomıkadaǵy eń urymtal tustardy atady - Rahman Alshanov

ALMATY. QazAqparat - Memleket basshysy Nursultan Nazarbaev óz joldaýynda el ekonomıkasy men áleýmettik ahýalynyń eń bir urymtal tustaryn dóp basyp atady. Bul týraly pikirin QazAqparat tilshisine Almaty qalalyq qoǵamdyq keńesiniń tóraǵasy Rahman Alshanov aıtyp berdi.

Onyń aıtýynsha, bıylǵy Joldaýdyń ereksheligi - Prezıdenttiń kóptegen mańyzdy máselelerge basa mán berýinde.

«Baǵdarlamalar qabyldandy, ınvestıtsııa bólingen, qaýlylar bar. Biraq nege jobalar jumys jasamaıdy? Osy jáne ózge de ózekti máseleler tilge tıek etildi. Máselen, qazaqstandyqtar nege syrttan kelgen shujyq pen taýyq etin jep otyr? OQO-da mektepter úsh aýysymmen jumys jasasa, soltústik aýdandarda nege jańadan salynǵan mektepter qańyrap bos tur? Investıtsııa durys baǵyttalmaǵan. Avtobandar salynǵan, biraq aýyl arasynda jol joq. Bul aýyl-aımaqqa sý qubyryn tartyp, biraq úıge jetkizip bermegenmen teń», - dedi R.Alshanov.

Sarapshynyń aıtýynsha, QR Qarjy mınıstrligi osy baǵytta baqylaýdy kúsheıtýi tıis.

«Ekonomıka únemdi bolǵany abzal. Sonymen qatar, adamnyń jaǵdaıyn jasaýǵa baǵyttalýy tıis. Meniń oıymsha, endi atqarý organdary atalǵan máselege muqııat qarap, mindetterdiń oryndalýyn qadaǵalaıdy. Elbasymyz únemi aldyna oryndalatyn maqsattar ǵana qoıatyny belgili.  2019 jyl qazaq halqy úshin sátti jyl bolyp, mejeli maqsatqa qol jetkizemiz dep oılaımyn», - dedi ol.

Aıta ketý kerek, Prezıdent Nursultan Nazarbaev Aqordada Qazaqstan halqyna joldaýyn jarııa etti.

Strategııalyq qujat elimizdiń áleýmettik-ekonomıkalyq damýynyń ózekti máselelerine jáne qazaqstandyqtardyń ál-aýqatyn odan ári arttyrý mindetterine arnalǵan.