Memleket basshysy: EAEO elderinde tutyný baǵalary ósip barady

ASTANA. QazAqparat – Joǵary Eýrazııalyq ekonomıkalyq keńestiń Bishkektegi otyrysynda QR Prezıdenti Qasym-Jomart Toqaev EAEO -nyń óz ishinde ınflıatsııanyń artyp turǵanyna alańdaýshylyq bildirdi, dep habarlaıdy QazAqparat tilshisi.

«Odaq aıasynda aýqymdy birlesken jobalar iske asyrylyp jatyr, ózara esep aıyrysýdaǵy ulttyq valıýtalardyń úlesi artyp keledi. Mundaı jaǵymdy dınamıka ózara áreketterdiń joǵary deńgeıin jáne ıntegratsııalyq áriptestiń eleýli áleýeti bar ekenin aıqyn áıgileıdi.

Qazirgi geosaıası týrbýlenttilik jaǵdaıynda bizge ekonomıkalyq baılanystardy saqtaý jáne nyǵaıtý, saýda-ekonomıkalyq kooperatsııany odaq qaǵdıdattarymen maqsattarynyń aıasynda damytýǵa kúsh biriktirý óte mańyzdy», - dedi Prezıdent.

Memleket basshysynyń paıymynsha, odaq elderine birneshe basym máselege nazardy kóbirek aýdarý kerek.

«Birinshi másele – álemdik ınflıatsııanyń elderimizdiń ekonomıkasyna keri yqpalyn barynsha azaıtý. Halyqaralyq uıymdardyń boljamy kóńil kónshitpeıdi. 2023 jylǵy álemdik ekonomıkanyń ósimi týraly boljamdy Halyqaralyq valıýta qory 2,7 paıyzǵa deıin, Dúnıejúzilik saýda uıymy 2 paıyzǵa deıin túsirdi. Eýrazııalyq ekonomıkalyq komıssııanyń málimeti boıynsha, EAEO elderinde tutyný baǵalarynyń ósimi jalǵasýda. Odaq aıasyndaǵy ınflıatsııa qazan aıynda 11,5 paıyz boldy. Ósimniń negizgi úlesi tutynýshylyq jáne tutynýshylyq emes taýarlarǵa kelip otyr», - dedi Qasym-Jomart Toqaev.