Memleket basshysy Dosaev pen Shókeevke «úı tapsyrmasyn» berdi

ASTANA. QazAqparat - Aýyl sharýashylyǵy ónimderimen ózin tolyqtaı qamtamasyz etken el - naǵyz táýelsiz memleket. Bul týraly elordany odan ary damytý máseleleri jónindegi májiliste Elbasy Nursultan Nazarbaev aıtty, dep habarlaıdy QazAqparat.

«Barlyq ýaqytta da qalanyń azyq-túlik beldeýi jaıynda aıtyp kelemin. Qalada ınflıatsııa 7,5 paıyz. Qazir Qazaqstandaǵy eń joǵarysy deıdi. Solaı ma, álde qansha?», - dedi Nursultan Nazarbaev qala basshysy Áset Isekeshevke qarata.

Astana ákiminiń sózine qaraǵanda, naýryz aıynyń qorytyndysynda elorda ınflıatsııa deńgeıi boıynsha 5-6 orynda tur.

«Al azyq-túlik beldeýine qatysty aıtar bolsam, Nursultan Ábishuly sońǵy 5 jylda beldeý damydy. Aqmola, Qaraǵandy, Pavlodar oblystarynda Astana bazarlaryna ónimderin ákeletin kásiporyndar bar. Jáne de elordalyq kásiporyndar qalany 31 paıyzǵa qamtyp otyr. 44 paıyzy kórshiles oblystardyń kásiporyndary esebinen qamtamasyz etiledi. Olar Astananyń bazarlaryna baǵdarlanǵan», - dedi Áset Isekeshev.

Kelesi kezekte QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeevti ornynan turǵyzǵan Elbasy osy máselege qatysty esep berýin surady.

«Biz 20 ónim túri boıynsha tereń saraptama jasadyq. 12 túri boıynsha tolyqtaı 100 paıyz qamtamasyz etip otyrmyz. Olar: ettiń barlyq túri, qus eti, kartop, qyzylsha, qııar, qyzynaq. 8 túri boıynsha bizde 70 paıyz qamtamasyz etilse, 30 paıyzy boıynsha naqty sharalardy belgiledik. Bizde Astana tóńireginde sýarmaly jerlerdi ulǵaıtý kerek. Qazir elordanyń tóńireginde 2 myń gektar jer daıyn, qubyrlary jatyr, endi jaraqtandyrý qajet. Sonymen qatar Nura, Esil arnasy mańynan da 2 myń gektar jer tabamyz», - dedi Ómirzaq Shókeev.

Osy rette Qazaqstan Prezıdenti ózin aýyl sharýashylyǵy ónimderimen tolyqtaı qamtamasyz etken el naǵyz táýelsiz memleket sanalatyndyǵyn basa aıtty.

«Biz aýyl sharýashylyǵy elimiz ǵoı. Biz áli kúnge deıin ónimderdiń basym bóligin syrttan alyp otyrmyz. Et óndiremiz, shujyqty syrttan alamyz. Jemis-jıdek, kókónisti de tasymaldaımyz. Bizde ne bar, sonyń barlyǵyn syrttan alyp otyrmyz. Múmkin nandy da syrttan alatyn shyǵarmyz», - dedi Memleket basshysy.

Sonymen qatar Nursultan Nazarbaev QR Premer-Mınıstriniń orynbasarlary Erbolat Dosaev pen Ómirzaq Shókeevke azyq-túlik máselesine qatysty barlyq túıtkilderdi sheshýdi tapsyrdy.

«Bul senderge úı tapsyrmasy. Baqytjan Ábdiruly (Úkimet basshysy) túsindiń be? Orynbasarlaryńmen jaqsylap jumys iste», - dedi Elbasy.