Memleket basshysy Dımash Qudaıbergendi týǵan kúnimen quttyqtady

NUR-SULTAN. QazAqparat - Búgin Mədenıet jəne sport mınıstri Aqtoty Raıymqulova tanymal ənshi Dımash Qudaıbergendi qabyldap, týǵan kúnine oraı Memleket basshysy Qasym-Jomart Toqaevtyń quttyqtaý hatyn tabystady, dep habarlaıdy QazAqparat vedomstvonyń baspasóz qyzmetine silteme jasap.

«Qurmetti Dımash!

Jas kezińnen óner jolyn tańdap, úzdiksiz eńbektiń nətıjesinde úlken belesterdi baǵyndyra bildiń. Aldymen respýblıkalyq, keıin halyqaralyq baıqaýlarda dara shyqtyń. Ən arqyly ulttyq qundylyqtarymyzdy dəriptep, qazaqtyń tilin, qońyr dombyrasyn, izgi dəstúrlerin əlemge tanytyp kelesiń.

Aldaǵy ýaqytta elimizdiń rýhanı-mədenı salasyn órkendetýge mol úles qosyp, bilimiń men kəsibı biliktiligińdi jetildire beretinińe senim artamyn. Ózińe densaýlyq, jańa tabystar tileımin!», - dep jazylǵan Memleket basshysynyń quttyqtaý hatynda.

Osydan keıin Aqtoty Raıymqulova týǵan kún ıesin óz atynan quttyqtap, shyǵarmashylyq tabys tiledi.

«Siz Uly dala eli ónerin ǵalamdyq deńgeıde tanytyp kele jatqan ónerpaz retinde halyqtyń ystyq yqylasy men qurmetine bólenip jatyrsyz. Týǵan jerdiń topyraǵymen daryǵan daryn men talǵamnyń, tabandy izdenis pen qajyrly eńbektiń arqasynda jahan halyqtary súıip tyńdaıtyn ənshige aınaldyńyz. Siz baǵyndyrǵan bıik belester men tolaǵaı tabys izińizden ergen jastar úshin úlgili súrleý.

Aldaǵy ýaqytta da júrek qylyn shertetin týyndylaryńyzdyń qatary kóbeıip, ónersúıer qaýymdy qýanta berýińizge tilektespin», - dedi mınıstr.