Memleket basshysy: Dástúrli kitaphananyń aǵartýshylyq róli eshqashan mánin joǵaltpaıdy
«Jaqynda áleýmettik jelide elimizdegi kitaphanalardyń róli týraly qoǵam nazaryn aýdartqan pikirtalas boldy. Shyndyǵyna kelgende bul máseleniń mán-jaıy barshaǵa túsinikti bolýǵa tıis. Búgingi zamanda kitapsyz, sondaı-aq kitaphanasyz adamnyń oıdaǵydaı damýy múmkin emes. Búkil álemdegi kitaphanalar - bilim men mádenıettiń oshaǵy, jańa oılar men tyń pikirlerdiń mekeni. Elektrondy formattyń qarqyndy damyp jatqanyna qaramastan dástúri kitaphananyń aǵartýshylyq róli eshqashan mánin joǵaltpaıdy», - dedi Memleket basshysy.
Sondyqtan da Qazaqstan Prezıdenti jalpy kitaphanalardyń júıesi men jumysyn uıymdastyrýǵa jańasha kózqaraspen qaraý qajettigin basa aıtty.
«Bul rette osy saladaǵy zamanaýı úrdisterdi eskergenimiz jón. Mysaly, men Almaty qalasyndaǵy kitaphanalardy jańǵyrtýǵa arnalǵan osyndaı utymdy jobalar bar ekenin bilemin. Jaqynda keńes múshesi Raýan Kenjehanuly da maǵan aýyl mektepterin jáne kitaphanalardy jańǵyrtý jónindegi jobasyn kórsetti»,- dedi Qasym-Jomart Toqaev.