Memleket basshysy: Bıyl Qazaqstan-Reseı dıplomatııalyq baılanysynyń 30 jyldyǵyn atap ótemiz

MÁSKEÝ. QazAqparat – Bıyl Qazaqstan men Reseı eki aradaǵy dıplomatııalyq qarym-qatynasynyń 30 jyldyǵyn atap ótedi. Qazaqstan Prezıdenti Qasym-Jomart Toqaev reseılik áriptesi Vladımır Pýtınmen ótken kelissózderden keıingi BAQ ókilderine jasaǵan birlesken málimdemesinde osylaı dedi, dep habarlaıdy QazAqparat tilshisi.

«Bul jyl – bizdiń memleketter úshin aıtýly jyl. Memleketterimiz arasyndaǵy dıplomatııalyq qarym-qatynastardyń 30 jyldyǵyn atap ótemiz. Osy ýaqyt aralyǵynda dostyqtyń berik arqaýyna, tarıhymyzdyń ortaqtyǵyna, halyqtarymyzdyń mentaldyq jaqyndyǵyna súıenip, shynymen de úlgi bolarlyq memleketaralyq áriptestik qurdyq», - dedi Qazaqstan Prezıdenti.

Onyń aıtýynsha, údemeli saıası dıalogtyń arqasynda eki memleket búkil baǵyttar boıynsha tańǵalarlyq tabystarǵa jetken.

«Bizdiń aramyzdaǵy álemdegi eń uzaqqa sozylyp jatqan qurlyqtaǵy shekaramyz halyqaralyq qaýymdastyqqa naǵyz úlgi bolarlyq berekeli kórshilestiktiń, senimdi áriptestiktiń jáne saıası seriktestiktiń jarqyn mysaly bolyp otyr der edim», - dedi Memleket basshysy.

Aıta keteıik, Reseı Federatsııasynyń astanasynda QR Prezıdenti Qasym-Jomart Toqaev pen RF Prezıdenti Vladımır Pýtın kelissóz júrgizdi.

Memleket basshysynyń Reseıge jumys sapary aıasynda birqatar qujatqa qol qoıyldy.