Memleket basshysy: Azamattyq-quqyqtyq daýlar jónindegi sotqa prokýrordyń qatynasýy azaıady

ASTANA. QazAqparat - Azamattyq-quqyqtyq daýlar jónindegi sotqa prokýrordyń qatynasýy azaıady. Búgin Aqordada alǵash ret jarııa túrde elimizdiń jańa Azamattyq protsestik kodeksine qol qoıǵan QR Prezıdenti Nursultan Nazarbaev osylaı dedi.

QR Prezıdentiniń atap ótýinshe, jańa Azamattyq protsestik kodekste kóptegen mańyzdy ózgerister bar. Ony aqparat quraldaryna jarııalaǵan kezde halyq oqyp, túsinetin bolady. «Máselen, azamattyq-quqyqtyq daýlar jónindegi sotqa prokýrordyń qatynasýy azaıady. Іs júrgizýdiń jeńildetilgen túri keńinen qoldanylatyn bolady. Sottardyń qaraýyndaǵy ister ońtaılandyrylady. Bul jańa kodeks normalarynyń barlyǵy sottyń qorǵaýynyń tıimdiligin arttyrýǵa baǵyttalǵan», - dedi Elbasy. QR Prezıdenti jańa kodekske qol qoıǵannan keıin jaqyn arada onyń elge tıgizer paıdasyn kóre bastaıtyndyǵymyzdy basa aıtty. «Munan ary qaraı da tolyp jatqan zańdar bar. Olardyń barlyǵyn ózderińiz bilesizder. Shyǵyp jatqan zańdar bizge óte qajet. Aýyl sharýashylyǵyndaǵy kooperatıvtik júıeni iske qosý máselesi, shaǵyn jáne orta bıznesti qoldaý máselesi, taǵy-taǵy da «100 naqty qadamda» kórsetilgen zańnamalardy qol qoıyp, shyǵaratyn bolamyz. Elge qyzmet isteıtin bolamyz», - dedi N.Nazarbaev.