Memleket basshysy: Aýyl sharýashylyǵyna arnalǵan sý ratsıonaldy túrde jumsalýy kerek

NUR-SULTAN. QazAqparat – Memleket basshysy Qasym-Jomart Toqaev aýyl sharýashylyǵy qajettigine arnalǵan sý máselesin túpkilikti sheshýdi tapsyrdy, dep habarlaıdy QazAqparat tilshisi.

«Qazaqstan úshin aýqymdy problemalardyń biri – aýyl sharýashylyǵy qajettigine baılanysty sý bólý barysyndaǵy sýdyń aıtarlyqtaı jetispeýi. Bıyl bul baǵyttaǵy kórsetkish 2 myń tekshe shaqyrymǵa jetti. Bul – jınalǵan sýdyń 22 paıyzy. Mundaı kórsetkishter bizge qolaıly emes. Joldaýda men bul máseleni kótergen bolatynmyn. Ol bizdiń uzaqmerzimdi ekologııalyq turaqtylyǵymyzǵa ǵana áser etip qoımaı, elimizdiń tolyqqandy damýyna da kedergi keltiredi», - dedi Prezıdent Ulttyq qoǵamdyq senim keńesiniń otyrysynda.

Prezıdent sol sebepti bul máseleni zamanǵa saı tsıfrlyq tehnologııalardy paıdalana otyryp, jedel ári túpkilikti deńgeıde sheshý kerektigin eskertti.

«Sý ratsıonaldy túrde jumsalýy kerek. Bizde bul turǵyda sátti tájirıbe bar. Túrkistan oblysynyń Maqtaaral aýdanynda iri sharýashylyqaralyq arnany tsıfrlandyrý boıynsha K19 pılottyq jobasy sátti iske asty. Bul tájirıbeni keńinen paıdalaný kerek», - dedi ol.