Memleket basshysy aýyl sharýashylyǵy taýarlaryn óndirýshilermen kezdesti

RÝDNYI. QazAqparat – Memleket basshysy Rýdnyı qalasyndaǵy «Jas-Qanat 2006» qus fabrıkasyna baryp, sharýashylyqqa zamanaýı tehnologııalardy engizý jónindegi pılottyq jobanyń júzege asyrylý barysymen tanysty. Bul týraly QazAqparat Aqordaǵa silteme jasap habarlaıdy.

Qus fabrıkasynda óndiriletin ónim elimizdiń barlyq óńirlerinde satylady, sondaı-aq TMD elderine eksporttalady.

Tsehtyń qýaty jylyna 260 mıllıon dana jumyrtqa jáne 500 tonnadan astam et ónimderin óndirýge jetedi. Byltyr 517 tonna et jáne 199,1 mıllıon dana jumyrtqa óndirildi.

Óndiristik qýaty saǵatyna 120 myńnan astam jumyrtqa shyǵarýǵa jetetin suryptaý, ólsheý jáne markerleý tsehyndaǵy Nabel tehnologııasy kórsetildi.

Óndiristiń avtomattandyrylýy 8 saǵatta mıllıonǵa deıin jumyrtqa tasymaldaýǵa jáne oraýǵa múmkindik beredi.

Prezıdentke oblys ákimi Qumar Aqsaqalov óńirdiń ónerkásiptik jáne agrarlyq áleýeti jóninde málimet berdi. Atap aıtqanda, Qasym-Jomart Toqaev aq aýyl sharýashylyǵy salasyndaǵy perspektıvti jobalarmen tanysty.

Osydan keıin Memleket basshysy aýyl sharýashylyǵy taýaryn óndirýshilermen áńgimelesti. Qasym-Jomart Toqaev Qazaqstan Prezıdenti laýazymyna qaıta saılanǵannan keıin, eń aldymen aýyl men aýyldyq aýmaqtardy damytý týraly Jarlyqqa qol qoıǵanyn aıtty. Sondaı-aq, aýyl sharýashylyǵy men aýyldardy damytýǵa 1 trıllıon teńge bólinetinin jetkizdi. Onyń pikirinshe, Úkimet pen ákimdikter bul qarjyny óńir turǵyndaryna barynsha tıimdi bolatyndaı jumsaýy kerek.

Foto: akorda.kz