Memleket basshysy Atyraýdaǵy «Bolashaq» zaýytynyń óndiristik nysandaryn tikushaqpen aralap kórdi

Maqat aýdany. QazAqparat - Qazaqstan Prezıdenti Qasym-Jomart Toqaev Atyraý oblysyna sapary barysynda Maqat aýdanyndaǵy «Bolashaq» munaı jáne gaz óńdeý zaýytyna bardy, dep habarlaıdy QazAqparat Aqordaǵa silteme jasap.

Memleket basshysy «Bolashaq» zaýytynyń óndiristik nysandaryn tikushaqpen aralap kórdi.

Qazaqstan Prezıdentine munaı-gaz salasynyń ahýaly men ony damytý perspektıvalary jóninde baıandaldy. Sonymen qatar, Memleket basshysyna munaı óńdeýdiń jáne turaqtandyrýdyń, suıyltylǵan gazdy munaıdan ajyratyp alý jáne tazalaýdyń, tabıǵı kúkirtti óndirýdiń jáne ony saqtaý men tasymaldaýdyń tehnologııalyq úderisteri tanystyryldy.

Qasym-Jomart Toqaev óndiris ornynyń Atyraý qalasynan alys emesin atap ótip, qorshaǵan ortany qorǵaýǵa erekshe kóńil bólýge shaqyrdy. Sonymen qatar, Memleket basshysy Qazaqstan azamattarynyń eńbek quqyǵyn saqtaýdyń mańyzdylyǵyna toqtaldy.

Qazaqstan Prezıdenti kásiporyn ujymyn táýligine 370 myń barrel munaı óńdep, rekord jańartýymen quttyqtady jáne munaıshylarǵa tabys, baq-bereke tiledi.