Memleket basshysy agrarlyq salada mınıstr aýyssa, salanyń saıasaty da ózgeretinin synǵa aldy

NUR-SULTAN. QazAqparat – Agrarlyq salada sýbsıdııalaý tásilderin qaıta qarap, turaqtandyrý kerek. Bul týraly Memleket basshysy Qasym-Jomart Toqaev Qazaqstan halqyna arnalǵan Joldaýyn jarııalaý kezinde málim etti, dep habarlaıdy QazAqparat.

«Bizdiń agrarlyq saıasatymyzda sabaqtastyq bolmaı otyr. Mınıstr aýyssa, salanyń saıasaty da ózgeredi. Mundaı jaǵdaıda sharýalarǵa aldaǵy jumysty josparlaý qıynǵa túsedi. Biryńǵaı negizgi baǵyt bolýy qajet. Soǵan sáıkes sýbsıdııalaý tásilderin qaıta qarap, turaqtandyrý kerek», - dedi Memleket basshysy.

«Sońǵy 5 jyldyń ózinde sýbsıdııalaýǵa 2 trln teńgeden astam qarjy bólindi. Ókinishke qaraı, agroónerkásip keshenine qatysty qozǵalǵan qylmystyq isterdiń jartysynan astamy sýbsıdııany talan-tarajǵa salýǵa baılanysty bolyp otyr. Buǵan jol berýge bolmaıdy. Normatıvtik negizin nyǵaıtyp, tıimdi josparlaý jáne monıtorıng júrgizý júıesin engizý qajet. Sýbsıdııany rásimdeý tártibi túsinikti ári tolyǵymen ashyq bolýy tıis. Shaǵyn jáne orta sharýashylyqtar úshin sýbsıdııa tolyǵymen qoljetimdi bolýy kerek», - dedi Prezıdent.

Budan buryn habarlanǵandaı, Prezıdent jem-shóp daıyndaýǵa qajetti jer kólemin keńeıtý kerek ekenin aıtty.

Q. Toqaev jaıylym jerlerge qatysty ákimder yqpaldy adamdardyń yǵyna jyǵylyp otyrǵanyn synǵa aldy.