Memleket basshysynyń tapsyrmasymen Májilis tóraǵasy Iran prezıdentimen qoshtasý rásimine qatysty

<p>ASTANA. KAZINFORM &ndash; Memleket basshysy Qasym-Jomart Toqaevtyń tapsyrmasymen Májilis tóraǵasy Iran Islam Respýblıkasyna jumys saparmen bardy. Tegeranda Erlan Qoshanov prezıdent Ibrahım Raısıdyń qaıtys bolýyna baılanysty kóńil aıtý jáne qurmet kórsetýge arnalǵan is-sharaǵa qatysty.</p>

Búgin Iran halqy tikushaq apatynan qaıtys bolǵan prezıdent Ibrahım Raısımen qoshtasty. Prezıdentter saraıynda ótken kóńil aıtý jáne qurmet kórsetýge arnalǵan is-sharaǵa Qazaqstan delegatsııasyn Májilis tóraǵasy Erlan Qoshanov bastap bardy.

Palata spıkeri Iran Islam Respýblıkasy vıtse-prezıdenti Mohsen Mansýrımen jáne memlekettiń joǵary saıası basshylyǵymen kezdesip, Qazaqstan Prezıdentiniń atynan búkil Iran halqyna, sondaı-aq qaza tapqan adamdardyń otbasylaryna kóńil aıtty.

Foto: Májilis

– Bizdiń Prezıdentimiz bul sýyt habardy tereń kúızelispen qabyl aldy. Irannyń Joǵary lıderi Álı Hameneı men Iran halqyna qóńil aıtý hattaryn joldady. Sonymen qatar, keshe Irannyń Astanadaǵy Elshiligine baryp, kóńil aıtý kitabyna jazba qaldyrdy. Ibrahım Raısı Qazaqstan men Iran arasyndaǵy ózara senimge negizdelgen dostyq baılanystardyń damýyna zor úles qosqan tulǵa retinde bizdiń jadymyzda saqtalady, – dedi Erlan Qoshanov.

Májilis spıkeri Qazaqstan Prezıdenti Qasym-Jomart Toqaevtyń dostas Iranmen senimdi seriktestik pen tyǵyz áriptestikti nyǵaıtýǵa erekshe mán beretinin atap ótti.

– Osyndaı qıyn kezeńde Astanadaǵy elshiligimizge baryp, bizdiń halqymyzǵa qoldaý kórsetkeni jáne Irannyń Joǵary lıderi Álı Hameneı men halqymyzǵa qóńil aıtý hattaryn joldaǵany úshin Qazaqstan Prezıdenti Qasym-Jomart Toqaevqa alǵysymyz sheksiz. Muny eshqashan umytpaımyz. Aldaǵy ýaqytta qarym-qatynasymyzdy da damyta berýge múddelimiz, – dedi Mohsen Mansýrı.