Memleket basshysynyń atyna Jańa jylǵa oraı quttyqtaý jedelhattary kelip tústi
Reseı Prezıdenti Vladımır Pýtın Memleket basshysyna zor densaýlyq, baq-bereke, al Qazaqstan halqyna beıbitshilik pen ıgilik tiledi. Ol 2023 jyl Qazaqstan men Reseı qatynastary úshin aıtarlyqtaı tabysty bolǵanyna nazar aýdardy.
– Ekijaqty baılanystardy odan ári nyǵaıtýǵa baǵyttalǵan belsendi jáne syndarly sıpattaǵy birlesken jumystarymyz, sondaı-aq EAEO, UQShU, TMD, ShYU jáne basqa da kópjaqty uıymdar aıasyndaǵy seriktestik baılanystarymyz jalǵasady dep senemin. Bul bizdiń baýyrlas halyqtarymyzdyń múddesine saı keledi, – dep jazylǵan jedelhatta.
Ózbekstan Prezıdenti Shavkat Mırzıeev Jańa jylda Qasym-Jomart Toqaevtyń asa jaýapty memlekettik qyzmetine zor tabys tilep, baýyrlas Qazaqstan halqynyń ósip-órkendeı berýine nıettestik bildirgen.
– Bizdiń konstrýktıvti jáne dostyq sıpattaǵy dıalogymyz, túrli salada qol jetkizgen ýaǵdalastyqtarymyz, sondaı-aq iri jobalardyń tolyqqandy iske asyrylýy keleshekte jan-jaqty qarym-qatynasymyzdy nyǵaıtýǵa jáne yntymaqtastyǵymyzdy jańa deńgeıge kóterýge yqpal eterine senimdimin, – dep jazǵan Ózbekstan Prezıdenti jedelhatynda.
Qyrǵyzstan Prezıdenti Sadyr Japarov óz quttyqtaýynda ortaq kúsh-jigerdiń arqasynda qazaq-qyrǵyz arasyndaǵy odaqtastyq baılanystar odan ári nyǵaıyp, baýyrlas halyqtardyń múddesine qyzmet etedi dep senim bildirgen.
Belarýs Prezıdenti Aleksandr Lýkashenko Qasym-Jomart Toqaevqa qolǵa alǵan bastamalarynyń tabysty júzege asyrylýyna tilektestik bildirip, Qazaqstan halqyna beıbitshilik, mol ıgilik tilegen.
– Ótip bara jatqan jyl halyqaralyq kún tártibinde mańyzdy oqıǵalarǵa toly boldy. Sondaı-aq kez kelgen qıyndyqty birlese eńserýge bolatynyn kórsetti. Belarýs Respýblıkasy men Qazaqstan Respýblıkasy arasyndaǵy dostyq pen ózara túsinistik dástúri aldaǵy ýaqytta da nyǵaıa túsetinine, memleketterimizdiń túrli formattaǵy yntymaqtastyǵy tabysty bolatynyna senimdimin, – dep jazylǵan jedelhatta.
Tájikstan Prezıdenti Emomalı Rahmon óz quttyqtaýynda 2023 jyly qazaq-tájik strategııalyq seriktestigi mańyzdy jańalyqtarmen este qalǵanyn, eki halyq arasyndaǵy yntymaqtastyq odan ári jan-jaqty damı beretinin atap ótken.
Sonymen qatar Memleket basshysyn QHR Tóraǵasy Sı Tszınpın, Túrikmenstan Prezıdenti Serdar Berdimuhamedov, Ázerbaıjan Prezıdenti Ilham Álıev, Armenııa Premer-mınıstri Nıkol Pashınıan, Fınlıandııa Prezıdenti Saýlı Nıınıste, BAÁ Prezıdenti Muhammed ben Zaıd Ál Nahaıan, Iran Prezıdenti Ibrahım Raısı, Estonııa Prezıdenti Alar Karıs, Ýkraına Prezıdenti Vladımır Zelenskıı, BAÁ Vıtse-prezıdenti, Premer-mınıstri jáne Dýbaı Ámirshisi Muhammed ben Rashıd Ál Maktým, Japonııa Premer-mınıstri Fýmıo Kıshıda, Norvegııa Koroli V Harald, Túrikmenstan Halk Maslahatynyń tóraǵasy Gýrbangýly Berdimuhamedov, BAÁ Vıtse-prezıdenti, Prezıdent Ákimshiliginiń basshysy Mansýr ben Zaıd Ál Nahaıan, Reseı Premer-mınıstri Mıhaıl Mıshýstın, Qytaıdyń Halyqtyq saıası konsýltatıvtik keńesi Búkilqytaılyq komıtetiniń tóraǵasy Van Hýnın jáne shet memleketterdiń burynǵy basshylary, halyqaralyq iri uıymdardyń, kompanııalardyń, bankterdiń, qarjy ınstıtýttarynyń, dıplomatııalyq mıssııalardyń jetekshileri men basqa da resmı tulǵalar quttyqtady.
Quttyqtaýlar áli de kelip jatyr.