Memleket basshysyna elimizdegi sýdıalar korpýsynyń qazirgi jaı-kúıi baıandaldy

<p>ASTANA. KAZINFORM &ndash; Prezıdent Joǵary sot keńesiniń tóraǵasy Denıs Shıppti qabyldady. Bul týraly Aqordanyń baspasóz qyzmeti málim etti.&nbsp;</p>

Memleket basshysyna Joǵary sot keńesiniń 2023 jyly atqarǵan qyzmetiniń qorytyndysy, elimizdegi sýdıalar korpýsynyń qazirgi jaı-kúıi jáne aldaǵy kezeńge arnalǵan jospary jóninde baıandaldy.

Denıs Shıpptiń aıtýynsha, Keńes byltyr Memleket basshysy júktegen birqatar mindetti júzege asyrǵan. Atap aıtqanda, Joǵary sot keńesin ınstıtýtsıonaldyq turǵyda kúsheıtý jáne sýdıa bolýǵa úmitkerlerdi daıyndaý, biliktiligin kóterý, olardyń shekti jasyn uzartý, ókilettikterin ýaqytsha toqtatý nemese múlde toqtatý máselelerin atalǵan organnyń quzyretine berý jumystary atqarylǵan.

Qasym-Jomart Toqaevqa Keńestiń sýdıalardy irikteý tártibin jetildirý, ashyqtyq pen tıimdilikti qamtamasyz etý jumystary týraly málimet berildi. Qabyldanǵan sharalardyń nátıjesinde jańadan taǵaıyndalǵan sýdıalardyń qataryn kóbeıtý úrdisi saqtalyp otyr. Byltyr sýdıa laýazymyna alǵash ret usynylǵan azamattardyń sany sot júıesinen ketkenderge qaraǵanda 32 adamǵa artyq boldy. Genderlik turǵydan áıel sýdıalardyń sany er adamdarmen salystyrǵanda 172 adamǵa kóp. Sýdıalardyń ortasha jas mólsheri – 46 jas, al eńbek ótili – 13 jyl.

Іrikteý barysynda ashyqtyq pen jarııalylyqty qamtamasyz etý úshin konkýrs rásimderin onlaın-translıatsııa jasaý jáne onyń qorytyndysy týraly egjeı-tegjeıli túsinikteme berý tájirıbesi alǵash ret engizildi. Sonymen qatar ótken jyly Parlament Senatynyń qaraýyna engizý úshin Memleket basshysyna Joǵarǵy Sot sýdıalarynyń laýazymyna úmitkerler tizimi birinshi ret balama negizde usynyldy.

Budan bólek, aýdandyq sot tóraǵalaryn saılaý tártibine jańa elementterdiń engizilýine baılanysty Prezıdentke sýdıa laýazymy úshin kadrlyq rezerv jasaqtaý ınstıtýtynyń róli kúsheıtilgeni jóninde aqparat berildi.

Qazirgi tańda sheshim shyǵarý barysynda sýdıalardyń zańdy óreskel buzǵany úshin kúshi joıylǵan árbir sot aktisin Sot jıýrıiniń tekserý mehanızmin zań júzinde engizý jumystary júrgizilip jatyr.

Kezdesý sońynda Qasym-Jomart Toqaev sýdıalardyń táýelsizdigin kúsheıtýge jáne olardy sapaly túrde irikteýge baǵyttalǵan reformalardy tıimdi júzege asyrý jumystaryn jalǵastyrýdy tapsyrdy.