Memleket basshysy jasandy ıntellekt salasyndaǵy sarapshylarmen kezdesti
Memleket basshysy JI qazirgi zamandaǵy progrestiń eń basty qozǵaýshy kúshteriniń biri sanalatynyn ári ekonomıkany túbegeıli ózgerte alatynyn atap ótti.
– Qazaqstanda jasandy ıntellektti ilgeriletýge berik negiz qalaý úshin mańyzdy qadamdar jasalyp jatyr. Instıtýtsıonaldyq orta qalyptastyrýǵa, ınfraqurylym men adam kapıtalyn damytýǵa basa mán berilip otyr. Instıtýtsıonaldyq qurylym aıasynda Jasandy ıntellekt jónindegi halyqaralyq konsýltatıvtik keńes qurylady. Oǵan ózim jetekshilik jasaımyn. Bul keńes álemdik deńgeıdegi sarapshylarmen dıalog júrgizip, pikir almasatyn strategııalyq alańǵa aınalady. JI salasyndaǵy ulttyq saıasatqa qatysty usynymdar ázirlep, halyqaralyq yntymaqtastyqty nyǵaıtý maqsatynda onyń jumysyna ınjenerler, zertteýshiler men kásipkerler keńinen tartylady, – dedi Prezıdent.
Qasym-Jomart Toqaev Qazaqstan JI salasyna joǵary sanatty maman daıarlaý jáne qoldaý isine aıryqsha basymdyq berip otyrǵanyna toqtaldy. Prezıdenttiń aıtýynsha, JI-diń qoldanysqa tabysty enýi osyndaı tehnologııalardy ázirleıtin jáne paıdalanatyn adamdardyń biliktiligi men tájirıbesine tikeleı baılanysty.
Sonymen qatar Memleket basshysy elimizde AlemAI ozyq tehnologııalar ortalyǵy qurylǵanyn málimdedi. Ortalyq álemdegi úzdik tájirıbelerdi ıgerip, ınnovatsııalyq sheshimderdiń engizilýine yqpal etedi. Prezıdent jasandy ıntellektke baılanysty bastamalardy júzege asyratyn habta mektepterge, ýnıversıtetterge jáne kásibı daıarlyq ortalyqtaryna arnalǵan bilim berý baǵdarlamalary jasaqtalatynyn aıtty. Sondaı-aq onda zertteýshilerge, startaptar men kompanııalarǵa arnalǵan keńseler, tájirıbe almasý alańdary ornalasady.
– Biz JI salasyndaǵy adam kapıtalyn damytý maqsatynda AI-Sana dep atalatyn ınnovatsııalyq bilim berý baǵdarlamasyn jasadyq. Baǵdarlama túrli sala mamandarynyń pánaralyq daıarlyǵyn qamtamasyz etedi jáne JI-ge qatysty ozyq sheshimderdi ázirleýge septigin tıgizedi, – dedi Prezıdent.
Qasym-Jomart Toqaev sóz sońynda Qazaqstan jahandyq jasandy ıntellekt ekojúıesiniń belsendi múshesi bolýǵa umtylatynyn jetkizdi. Sonymen qatar kezdesýge qatysýshylardy ǵylymı zertteýden bastap etıkalyq standarttardy bekitýge deıingi san salaly jumysqa atsalysýǵa shaqyrdy.
Jıynǵa Polynome kompanııasynyń negizin qalaýshy Aleksandr Hanın, G42 kompanııasynyń jasandy ıntellekt jónindegi bas dırektory Djekson Endrıý, Abý Dabıdegi Halıfa ǵylym jáne tehnologııa ýnıversıtetiniń professory Debba Merýan, BUU-nyń «Igilikke arnalǵan JI» bastamasy atqarýshy keńesiniń tóraǵasy Ál Mazrýı Ebtesam, Core42 kompanııasynyń memleket isteri jáne seriktestik jónindegi dırektory Ál Kaıssı Talal, Muhammed ben Zaıd atyndaǵy Jasandy ıntellekt ýnıversıtetiniń rektory jáne professory Tımatı Boldýın, Saal.ai kompanııasynyń jasandy ıntellekt bóliminiń jetekshisi Abdýlnabı Abrar, Mubadala Investment Company venchýrlyq jobalar jáne damý bóliminiń jetekshisi Ál Mazrýı Farıs Sýheıl qatysyp, pikir bildirdi.
Aıta keteıik, buǵan deıin Prezıdent Abu Dhabi Ports Group bas dırektory Muhammed Ál-Shamısımen kezdesken.