Memleket basshysy Valentına Matvıenkomen kezdesti
Qasym-Jomart Toqaev Federatsııa Keńesi tóraǵasynyń sapary parlamentaralyq baılanysty nyǵaıtý turǵysynan ǵana emes, Qazaqstan men Reseıdiń kópjosparly strategııalyq seriktestigin barlyq baǵytta odan ári arttyrý úshin mańyzdy ekenin aıtty.
– Memleketterimiz arasyndaǵy qarym-qatynas qarqyndy damyp keledi. Jaqynda bizdiń elimizge Vladımır Vladımırovıch Pýtın memlekettik sapar jasady. Bul strategııalyq seriktestikti, eki el arasyndaǵy odaqtastyqty damytýǵa tyń serpin berdi. Men ekijaqty yqpaldastyqtyń bolashaǵy zor dep oılaımyn, – dedi Prezıdent.
Qasym-Jomart Toqaevtyń aıtýynsha, bul úderiste parlamentaralyq dıplomatııa aıryqsha rólge ıe. Prezıdent depýtattar Qazaqstan men Reseı arasyndaǵy ózara tıimdi yntymaqtastyqty ilgeriletýge aıtarlyqtaı úles qosady dep sanaıdy.
Óz kezeginde Valentına Matvıenko qonaqjaılyq tanytqany úshin Qasym-Jomart Toqaevqa rızashylyǵyn bildirip, Qazaqstanǵa zor yqylaspen jáne parlamenttik úlken delegatsııany bastap kelgenin aıtty. Ol Reseı Prezıdentiniń sálemin jetkizip, Vladımır Pýtın Astanaǵa jasaǵan saparynyń qorytyndysyn joǵary baǵalaǵanyn atap ótti.
– Reseı Prezıdentiniń Qazaqstanǵa sapary óte tabysty ári nátıjeli boldy. Eń bastysy, ózara tıimdi jáne qurmetke negizdelgen bizdiń yntymaqtastyǵymyzdyń qarqyny artyp keledi. Qazaqstan men Reseı prezıdentteriniń birlesken kúsh-jigeriniń arqasynda ekijaqty qarym-qatynas buryn-sońdy bolmaǵan deńgeıge jetti. Taýar aınalymy, ınvestıtsııa, óndiristegi iri jobalar, energetıka, aýyl sharýashylyǵy sekildi qaı salany alyp qarasaq ta, eki el arasyndaǵy berik strategııalyq seriktestik pen odaqtastyqtyń naǵyz úlgisin kóremiz, – dedi Valentına Matvıenko.
Kezdesýde saýda-ekonomıkalyq jáne mádenı-gýmanıtarlyq yntymaqtastyqtyń ózekti máseleleri talqylandy.