Memleket basshysy Túrkııa Ulttyq Májilisiniń tóraǵasyn qabyldady

<p>ASTANA. KAZINFORM - Memleket basshysy Túrkııa Ulttyq Májilisiniń tóraǵasy Nýman Kýrtýlmýshty qabyldady. Kezdesýde Qazaqstan men Túrkııanyń keńeıtilgen strategııalyq seriktestigin odan ári nyǵaıtý máseleleri talqylandy, dep habarlaıdy Aqordanyń baspasóz qyzmeti.&nbsp;</p>

Memleket basshysy parlamenttik dıplomatııanyń áleýetin joǵary baǵalaıtynyn atap ótip, Túrkııa Ulttyq Májilisi tóraǵasynyń Qazaqstanǵa saparynyń máni zor ekenine nazar aýdardy.

Foto: Aqorda

– Búgingi kezdesý Dostyq jáne yntymaqtastyq týraly kelisimniń 30 jyldyǵy qarsańynda ótip jatyr. Munyń sımvoldyq máni bar. Jaqynda ǵana áriptesim Rejep beımen telefon arqyly sóılestim. Biz únemi habarlasyp otyramyz. Sondyqtan eki el arasyndaǵy dıalog óte jaqsy damyp kele jatyr. Jalpy, Túrkııa – Qazaqstannyń eń iri bes saýda seriktesiniń biri. Sonymen qatar basty 10 ınvestordyń qataryna kiredi. Byltyr ekijaqty saýda-sattyq kólemi 6 mıllıard dollarǵa jetti. Biraq munymen toqtap qalýǵa bolmaıdy. Qarym-qatynasymyzdyń áleýeti óte zor. Sondyqtan keleshekte ózara saýda aınalymy 10 mıllıard dollarǵa jetetinine eshqandaı kúmánimiz joq, – dedi Prezıdent.

Nýman Kýrtýlmýsh atajurtta túrik delegatsııasyna kórsetilgen syı-qurmet úshin rızashylyǵyn bildirdi.

Foto: Aqorda

– Qazaqstan – bizdiń atajurtymyz ári túrki halqyna ortaq rýhanı tulǵa Qoja Ahmet ıAsaýıdiń otany. Biz Túrkistan qalasyna jol júrip, qasıetti oryndarǵa zııarat etemiz jáne Qoja Ahmet ıAsaýı atyndaǵy Qazaq-Túrik halyqaralyq ýnıversıtetinde konferentsııa ótkizemiz. Qazaqstan Sizdiń basshylyǵyńyzben damýdyń jańa kezeńine qadam basty. Elińizde tabysty saıası-ekonomıkalyq, áleýmettik reformalar júrip jatyr. Munyń bári Qazaqstannyń órkendeýine oń yqpalyn tıgizedi dep oılaımyn. Aldaǵy ýaqytta Túrkııa men Qazaqstan arasyndaǵy yntymaqtastyq odan ári nyǵaıa túsetinine senimdimin. Eki eldiń saýda, tehnologııa, ónerkásip, logıstıka, energetıka jáne aýyl sharýashylyǵy salalaryndaǵy áleýeti zor, – dedi Túrkııa Ulttyq Májilisiniń tóraǵasy.

Qasym-Jomart Toqaev pen Nýman Kýrtýlmýsh eki eldiń halyqaralyq uıymdar aıasyndaǵy yqpaldastyǵyn kúsheıtý jáne Túrki memleketteri uıymyna múshe baýyrlas elderdiń ózara yntymaǵyn nyǵaıtý jóninde pikir almasty. Sondaı-aq Túrkııa eliniń basshylyǵymen aldaǵy kezeńge josparlanǵan joǵary deńgeıdegi kezdesýler pysyqtaldy.

Memleket basshysy túrik sportshylary men delegatsııasy bıyl qyrkúıek aıynda Astanada ótetin V Dúnıejúzilik kóshpendiler oıyndaryna belsendi qatysatynyna senim bildirdi.