Memleket basshysy Siemens AG basqarma tóraǵasyn qabyldady

<p>Memleket basshysy Siemens AG kompanııasynyń basqarma tóraǵasy Roland Býshty qabyldady, dep habarlaıdy Aqordanyń baspasóz qyzmeti.</p>

Kelissóz barysynda ónerkásip, energetıka, mashına jasaý jáne tsıfrlandyrý salalaryndaǵy ózara yqpaldastyqtyń múmkindikteri jan-jaqty talqylandy.

Siemens AG kompanııasy – kólik, energetıka, medıtsına qural-jabdyqtary, elektr jáne jaryq tehnıkasy ónimderi men qyzmetterin usynatyn, sondaı-aq ónerkásiptiń túrli salasynda arnaýly qyzmet kórsetetin Germanııa jáne Eýropa Odaǵy aýmaǵyndaǵy iri ındýstrııalyq konglomerat.

Qasym-Jomart Toqaev Qazaqstan naryǵyna alǵash kelgen nemis kompanııalarynyń biri – Siemens elimizdiń tehnologııalyq damýyna eleýli úles qosqanyn atap ótti. Prezıdent Siemens AG kompanııasymen yntymaqtastyqtyń keleshegi zor ekenin aıtty.

Kezdesýde dıalogty jalǵastyrý jáne ınnovatsııalyq damýǵa, azamattardyń ál-aýqatyn arttyrýǵa yqpal etetin birlesken jobalardy odan ári júzege asyrý mańyzdy ekeni atap ótildi.