Memleket basshysy ShUAA partııa komıtetiniń hatshysy Ma Sınjýımen kezdesti
Prezıdent Qasym-Jomart Toqaev Qytaı Halyq Respýblıkasyna resmı sapary aıasynda Úrimji qalasyna kelip, QKP OK Saıası bıýrosynyń múshesi, QHR Shyńjań-Uıǵyr avtonomııalyq aýdany partııa komıtetiniń hatshysy Ma Sınjýımen kezdesti.
Memleket basshysy saýda, ónerkásip, kólik, logıstıka, aýyl sharýashylyǵy jáne týrızm sııaqty kóptegen baǵyt boıynsha Qazaqstannyń Shyńjańmen aradaǵy qarym-qatynastarynyń nátıjelerin joǵary baǵalady.
– Qazaqstannyń Shyńjańmen ózara saýda-sattyq máselesinde óńirlik yntymaqtastyqtyń qoldanystaǵy mehanızmderiniń máni zor. Meniń oıymsha, olardy durys paıdalana bilsek, aıtarlyqtaı ilgerileýge bolady. Qazaqstan sizdiń aımaǵyńyzǵa jetkiziletin ónim túrlerin ulǵaıtýǵa daıyn. Atap aıtqanda, metallýrgııa, munaı hımııasy, mashına jasaý, tamaq ónimderin, sondaı-aq qurylys materıaldaryn eksporttaı alamyz. Al agroónerkásip jáne azyq-túlik sektoryndaǵy yqpaldastyqqa keler bolsaq, bul baǵyttaǵy áleýetimiz zor. Qazaqstan Qytaı naryǵyna ekologııalyq taza aýyl sharýashylyǵy ónimderin turaqty jetkize alady dep sanaımyz, – dedi Qasym-Jomart Toqaev.
Prezıdenttiń aıtýynsha, Qazaqstannyń shekaralas tórt oblysy men Shyńjań ólkesi arasynda tyǵyz baılanys ornaǵan. Qazaqstannyń Qytaımen saýda-sattyǵynyń jalpy kólemi boıynsha Shyńjań-Uıǵyr avtonomııalyq aýdanynyń úlesi 40 paıyzdan asady. Bul rette elimizdiń Shyńjańmen taýar aınalymy bıylǵy jartyjyldyqta 87 paıyzǵa ósip, 8,5 mıllıard dollardy qurady.
Sonymen qatar Memleket basshysy Qazaqstan men Qytaı arasyndaǵy úshinshi temirjol ótkelin salýdyń mańyzdylyǵyna nazar aýdardy. Prezıdent osy jobany iske asyrýǵa jaqyn arada kirisýge bolady dep esepteıdi.
Saýda-ekonomıkalyq baılanystardan bólek, sý salasyndaǵy yntymaqtastyqty damytýdyń jáne transshekaralyq ózenderdi paıdalanýdyń mańyzdy ekeni atap ótildi.
Áńgimelesý barysynda Qasym-Jomart Toqaev týrızm salasyna aıryqsha toqtaldy.
– Týrızm salasyndaǵy yntymaqtastyqtyń keleshegi zor. Qazaqstannyń bul baǵyttaǵy mol áleýetin eskere otyryp, jaqynda Týrızm jáne sport mınıstrligin qurdym. Biz Qazaqstanǵa saıahattaıtyn qytaılyq týrıster sany artady dep úmittenemiz. Úkimetimiz eldegi týrızm salasyn damytýǵa bar kúsh-jigerin jumsaıdy. Sonymen qatar Qytaıda kelesi jyl qazaq týrızminiń jyly bolyp jarııalandy. Árıne, biz otandastarymyzdyń sizdiń elmen jáne onyń ásem tabıǵatymen, áleýmettik-ekonomıkalyq damý jetistikterimen tanysýy úshin Qytaıǵa saıahattap barýyn qoldaımyz, – dedi Memleket basshysy.
Sonymen qatar Prezıdent Qazaqstan men Shyńjań-Uıǵyr avtonomııalyq aýdanynyń tarıhı-mádenı, gýmanıtarlyq baılanystarynyń máni men mańyzyna nazar aýdardy.
– Shyńjań ejelden óziniń joǵary mádenıetimen áıgili. Jergilikti shyǵarmashylyq ujymdar halyqaralyq dárejede moıyndalǵan. Biz mádenı-rýhanı baılanystardyń jan-jaqty damýyna, eki el ónerpazdarynyń bir-birine gastroldik saparlar uıymdastyrýyna qoldaý kórsetemiz. Bul tatý kórshilik jáne dostyq qatynastardyń nyǵaıýyna oń yqpal etetini sózsiz, – dedi Memleket basshysy.
Óz kezeginde Ma Sınjýı Qazaqstan Prezıdenti men QHR Tóraǵasynyń kelissózderi barysynda qol jetkizilgen ýaǵdalastyqtardy júzege asyrýdyń mańyzdylyǵyn, sondaı-aq «Bir beldeý, bir jol» forýmynda kóterilgen bastamalardyń máni zor ekenin aıtty.
– Biz aýyl sharýashylyǵy, transshekaralyq saýda, energetıka salalaryna basa mán bere otyryp, saýda-ekonomıkalyq yntymaqtastyqty odan ári nyǵaıtamyz. Sonymen qatar ǵylymı uıymdar, joǵary oqý oryndary jáne kásiporyndar arasyndaǵy qarym-qatynasty jolǵa qoıamyz. Qazaqstanǵa nemese Shyńjań ólkesine ınvestıtsııa quıyp, bıznes ashýdy kózdeıtin birlesken kásiporyndardy yntalandyramyz, – dedi Shyńjań-Uıǵyr avtonomııalyq aýdany partııa komıtetiniń hatshysy.
Ma Sınjýı Qazaqstan Prezıdentiniń Shyńjańǵa saparyn tarıhı oqıǵa retinde baǵalap, Shyńjań-Uıǵyr avtonomııalyq aýdanynyń basshylyǵy bizdiń elmen aradaǵy yntymaqtastyqty keńeıtýge jáne turaqty baılanysty saqtaýǵa múddeli ekenin jetkizdi.
Kezdesý sońynda Qazaqstan Prezıdentiniń Shyńjań ólkesine sapary aımaqaralyq yntymaqtastyqtyń odan ári nyǵaıýyna yqpal etetini atap ótildi.