Memleket basshysy SANA Sport ortalyǵyna bardy
Prezıdent elordadaǵy áleýmettik nysandardy aralap kórý barysynda otbasylyq SANA Sport ortalyǵynda boldy.
Munda sport, shyǵarmashylyq, bilim baǵyttary boıynsha 29 úıirme jumys isteıdi. Sondaı-aq 29 jattyqtyrýshy jáne 25 joǵary bilikti pedagog eńbek etedi.
Memleket basshysyna «Damu Development Group» konsortsıýmy júzege asyryp jatqan áleýmettik jobalar jóninde málimet berilip, SANA Sport kesheni aýmaǵyndaǵy saıabaqty qaıta jańǵyrtý jospary tanystyryldy.
Qasym-Jomart Toqaev ortalyqtaǵy sport zaldaryn, shyǵarmashylyq úıirme bólmeleri men oqý kabınetterin aralap kórdi. Sonymen qatar úıirmege sheberlik dárisin ótkizýge kelgen shahmattan eki dúrkin álem chempıony Aıarý Altynbekke syılyq tabystap, sáttilik tiledi. Jas shahmatshy buǵan deıin Prezıdentke hat jazyp, kezdesý jaıynda ótinishin jetkizgen edi. Búgin júzdesýdiń sáti tústi.
Keshende 4 myńnan astam balanyń qosymsha bilim alýyna jaǵdaı jasalǵan. Áleýmettik jaǵdaıy tómen otbasynan shyqqan jetkinshekterdiń úıirmelerge qatysýyna «Mereke» qaıyrymdylyq qory qoldaý kórsetedi.