Memleket basshysy Respýblıkalyq shtabtyń otyrysyn ótkizdi
– Bıylǵy qarǵyn sý aýqymy jaǵynan sońǵy 30 jyldaǵy eń iri sý tasqyny sanalǵan 2012 jáne 2017 jyldardaǵy deńgeıden asyp ketti. Bul neni bildiredi? Boljam jumystary múldem bolmaǵan. Jaǵdaı salalyq mamandardyń tapshylyǵynan týyndap otyr. Eger ákimdikter jyl saıyn sý tasqynyna qarsy josparlanǵan barlyq is-sharany tıisti deńgeıde júzege asyrǵanda, aýa-raıy jaǵdaıyn eskergenniń ózinde, apattyń saldary men aýqymy munshalyqty bolmas edi. Soǵan qaraǵanda, ákimdikter bul jumystarmen aınalyspaǵan. Qazir sý tasqynynan tónetin qaýip seıildi deýge kelmeıdi. Sondyqtan Іshki ister mınıstrliginiń, Ulttyq ulannyń, Qarýly Kúshterdiń, Ulttyq qaýipsizdik komıtetiniń barlyq kúshi men quralyn, onyń ishinde kadrlyq jáne tehnıkalyq resýrsyn barynsha jumyldyrý qajet. Sonymen qatar eriktilerdi, járdem bergisi keletin azamattardy tartý kerek. Alaıda, eń bastysy – memlekettik organdar. Ahýal kez kelgen sátte ýshyǵyp ketýi múmkin. Qazirgi basty mindet – adam shyǵynyna jol bermeý. Bul oraıda jiberilgen qatelikter men olqylyqtardy eskerýimiz qajet, – dedi Prezıdent.Qasym-Jomart Toqaev Úkimetke, quzyrly memlekettik organdarǵa jáne oblys ákimderine birqatar tapsyrma berdi.
– Sý tasqynynan zardap shekken adamdarǵa tıisti barlyq kómek kórsetilsin. Bul maqsatqa Úkimettiń jáne ákimdikterdiń rezervin ǵana emes, «Qazaqstan halqyna» qorynyń qarjysyn da paıdalaný qajet. Osyndaı jaýapty sátte elimizdegi bıznes ókilderin halyqqa qol ushyn sozýǵa shaqyramyn. Apattan zardap shekken azamattarǵa jáne aımaqtarǵa barynsha qoldaý kórsetý kerek. Bul – dál qazirgi kezeńde barshaǵa ortaq mindet. Qarǵyn sýdan qatty shyǵynǵa ushyraǵan batys aımaqtarda iri kásiporyndar kóp. «Samuryq-Qazyna» qoryna qarasty kompanııalar, jer qoınaýyn ıgerýshiler bar. Olar halyqqa járdem berip, búlingen ınfraqurylymdy qalpyna keltirýge atsalysady dep senemin, – dedi Memleket basshysy.
Prezıdent sý basqan aımaqtarda áleýmettik mańyzy bar qyzmetter men azyq-túlik baǵasynyń ósýine jol bermeý máselesine Úkimet nazaryn aýdardy.
– Sý tasqyny men órtke qatysty jaǵdaı jyl saıyn qaıtalanady. Jaýapty organdar men salalyq qyzmetterdiń (Qazsýshar, Qazgıdromet) jobalaý, saraptama jasaý jumystary nashar uıymdastyrylǵan. Tıisti sharalar, negizinen, jaǵdaı oryn alǵannan keıin nemese tolyqqandy boljam jasalmaı qabyldanady. Sondyqtan bizge daǵdarys jaǵdaılaryn boljaýdyń naqty tetigi óte qajet. Tsıfrlyq damý mınıstrligi Ekologııa, Sý resýrstary jáne Tótenshe jaǵdaılar mınıstrlikterimen birlesip jyl sońyna deıin barlyq yqtımal tótenshe jaǵdaılardy (sý tasqyny, órt jáne t.b.) modeldeýge, tıisti boljamdar, usynymdar men is-qımyl josparyn jasaýǵa múmkindik beretin aqparattyq júıe ázirleýge tıis. Aıtpaqshy, Úkimet pen jergilikti atqarýshy organdar, eń aldymen, oblystardyń ákimderi jazǵy maýsymǵa da daıyn bolýy qajet. Órt nemese basqa da tabıǵı apattardyń bolýy ábden múmkin. Qazirgideı qamsyz otyrmaı, aldyn ala áreket etý kerek. Sý tasqynyn kórgende, kókten túskendeı abdyrap qaldyńyzdar. Osy rette elimizdiń shyǵys óńirlerindegi sý tasqynyn modeldeý jónindegi TJM men «Qazaqstan Ǵarysh Sapary» ulttyq kompanııasynyń birlesken jumys tájirıbesin qoldanýǵa bolady, – dedi Qasym-Jomart Toqaev.
Prezıdent qarǵyn sýdy aýyl sharýashylyǵy qajetine jaratý úshin jospar ázirleý jáne pármendi sharalar qabyldaýdy tapsyrdy. Onyń aıtýynsha, ákimdikter erigen qar sýyn eldi mekenderden ózen arnalaryna nemese toǵandarǵa burý jumystaryn júrgizýi kerek.
Memleket basshysy Úkimet bekitken Sý resýrstaryn basqarý júıesin damytýdyń 2030 jylǵa deıingi tujyrymdamasyn synǵa aldy. Onyń pikirinshe, tujyrymdamany júzege asyrý jónindegi is-qımyl jospary deklaratıvtik sıpatqa ıe. Qujat sý tasqyny saldarynan bolatyn shyǵynnyń aldyn alý jáne azaıtý máselesin keshendi túrde sheshýge múmkindik bermeıdi. Sondyqtan tujyrymdamany qaıta qaraý jóninde mindet júkteldi.
– Quzyrly mekemeler, ıaǵnı ákimdikter, Tótenshe jaǵdaılar mınıstrligi, Sý resýrstary mınıstrligi birlesip jumys jasamaıdy. Jaýapkershilik alýdan qashady. Jumysty bir-birine siltep otyrady. Jaǵdaı osylaı jalǵasatyn bolsa, tıisti qyzmetkerlerdi laýazymynan bosatý qajet. Eń basty krıterıı – memlekettik qyzmetshilerdiń tıimdiligi. Memlekettik organdar jáne ákimdikter arasynda naqty ári turaqty baılanys algorıtmi joq. Tıisti mınıstrlik elimizdiń tabıǵı apattarǵa daıyndyǵyn qadaǵalap otyrýy qajet. Bul – mınıstrliktiń negizgi maqsaty. Osy máselege basa nazar aýdarý kerek. Mınıstrlik gıdrotehnıkalyq jáne basqa da mańyzdy nysandardyń jaǵdaıyn tekserip, shynaıy málimet berip otyrýǵa tıis, – dedi Prezıdent.
Memleket basshysy sý tasqyny máselesi boıynsha halyqaralyq tájirıbeni, ózge elderdiń qarǵyn sýdy qalaı ıgeretinin muqııat zertteý qajet ekenin aıtty.
Jıyn barysynda Qasym-Jomart Toqaev elimizde sý resýrstary, ırrıgatsııa salalary boıynsha tehnıkalyq mamandardyń tapshylyǵyna nazar aýdardy. Osyǵan qatysty Úkimetke shuǵyl túrde sheshim qabyldaýdy tapsyrdy.
Otyrys barysynda Premer-Mınıstr Oljas Bektenov, Tótenshe jaǵdaılar mınıstri Shyńǵys Árinov, Aqtóbe oblysynyń ákimi Ashat Shaharov, Batys Qazaqstan oblysynyń ákimi Narıman Tóreǵalıev, Qostanaı oblysynyń ákimi Qumar Aqsaqalov, Shyǵys Qazaqstan oblysynyń ákimi Ermek Kósherbaev, Qaraǵandy oblysynyń ákimi Ermaǵanbet Bólekpaev, Aqmola oblysynyń ákimi Marat Ahmetjanov, Soltústik Qazaqstan oblysynyń ákimi Ǵaýez Nurmuhanbetov, Ulytaý oblysynyń ákimi Berik Ábdiǵalıuly jáne Abaı oblysynyń ákimi Nurlan Uranhaev baıandama jasady.