Memleket basshysy Reseıdiń Syrtqy ister mınıstri Sergeı Lavrovty qabyldady
Memleket basshysy Reseı syrtqy saıasat vedomstvosynyń basshysyna iltıpat bildire otyryp, ekijaqty yntymaqtastyqtyń dostyq, tatý kórshilik jáne strategııalyq seriktestik rýhynda qarqyndy damyp kele jatqanyn atap ótti. Prezıdenttiń aıtýynsha, buǵan joǵary deńgeıdegi turaqty saıası dıalog, sondaı-aq eki el úkimetteri men parlamentteriniń úılesimdi jumysy aıtarlyqtaı yqpal etip otyr.
Áńgimelesý barysynda Reseı prezıdentiniń Qazaqstanǵa josparlanǵan memlekettik saparyna daıyndyq máselesine aıryqsha mán berildi.
– Biz aldaǵy saparǵa tyńǵylyqty daıyndalyp jatyrmyz. Bul memleketaralyq baılanystardaǵy aıtýly oqıǵa bolady dep sanaımyz. Eki eldiń yntymaqtastyǵy úlgi tutarlyqtaı jáne qarqyndy damyp keledi. Osy sapar strategııalyq seriktestik pen odaqtastyq qarym-qatynasqa tyń serpin beredi, – dedi Prezıdent.
Óz kezeginde Sergeı Lavrov Reseı men Qazaqstannyń kópjaqty yqpaldastyǵy, sonyń ishinde aldaǵy sapardyń kún tártibi úkimetter men syrtqy saıasat vedomstvolary arasynda egjeı-tegjeıli pysyqtalyp jatqanyn jetkizdi.
Reseı Syrtqy ister mınıstri Astanada Máskeý memlekettik halyqaralyq qatynastar ınstıtýtynyń 80 jyldyǵyna oraı ǵylymı-praktıkalyq konferentsııa uıymdastyrǵany úshin Qasym-Jomart Toqaevqa alǵys aıtty. Atalǵan jıyn dıplomatııalyq ortada jáne buqaralyq aqparat quraldarynda keńinen talqylanǵan.
Budan bólek, Qasym-Jomart Toqaev pen Sergeı Lavrov óńirlik jáne halyqaralyq kún tártibi, sondaı-aq kópjaqty qurylymdar men ıntegratsııalyq birlestikter aıasyndaǵy áriptestiktiń ózekti máseleleri jóninde pikir almasty.