Memleket basshysy Petropavl sý torabyna bardy

<p>PETROPAVL. KAZINFORM - Іrgetasy 1973 jyly qalanǵan nysan Sergeevka jáne Petropavl sý qoımalarynyń belgilengen rejımde toltyrylyp, iske qosylýyn qamtamasyz etý arqyly Esil ózeniniń aǵysyn retteıdi.</p>

Soltústik Qazaqstan oblysynyń ákimi Ǵaýez Nurmuhambetovtiń aıtýynsha, óńirdegi sý tasqynyna Esil ózeni muzynyń erýi jáne Aqmola oblysynan aǵyn sýdyń kelýi sebep bolǵan. Ásirese, bıylǵy seń júrý kezeńinde muzdardyń keptelisi saldarynan sý deńgeıi kúrt kóterilip, sel júrdi. Bul ınfraqurylymnyń isten shyǵýyna jáne Esil ózenin jaǵalaı ornalasqan eldi mekenderdi sý basýyna ákep soqtyrdy. Sondaı-aq ol sý tasqynyna qarsy is-sharalarǵa 2500 erikti belsendi qatysyp jatqanyn atap ótti. Aımaqqa 300 tonna gýmanıtarlyq kómek keldi.

Memleket basshysyna «Astana» óńirlik qolbasshylyǵy áskerleriniń qolbasshysy Erjan Ybyraev Soltústik Qazaqstan oblysyndaǵy tótenshe jaǵdaıdyń zardaptaryn joıý úshin qorǵanys vedomstvosynyń 700 áskerı qyzmetshisi men 33 tehnıkasy jumyldyrylǵanyn baıandady. Onyń aıtýynsha, áskerılerdiń negizgi kúshi qaptardy qummen toltyrý, bógetter salý, Petropavl qalasynyń mańyndaǵy aýdandar men Qyzyljar aýdanynyń eldi mekenderine jaqyn mańdaǵy jaǵalaýlardy nyǵaıtý jumystaryna baǵyttalǵan. Sý tasqynyna qarsy kúres sharalary bastalǵannan beri áskerıler jergilikti atqarýshy organdarymen birlesip, bógetter salý, olardy nyǵaıtý jumystaryn atqarǵan. Bul bógetterdiń jalpy uzyndyǵy 15 shaqyrymnan asady.

Foto: Aqorda

Qasym-Jomart Toqaevqa qalyptasqan jaǵdaıdy naqty ýaqyt rejıminde qadaǵalaýǵa múmkindik beretin jyljymaly basqarý pýnkti jabdyqtalǵany jóninde málimet berildi.

Ol úshin ár 2,5 saǵat saıyn jergilikti jerdiń 2D formatty kartasy arqyly aqparat berýge qabiletti ushqyshsyz basqarylatyn barlaýshy ushý apparaty paıdalanylady. Sondaı-aq táýlik boıy usha alatyn ári sý tasqynyna qatysty jaǵdaıdyń ózgerýine monıtorıng júrgizýge múmkindik beretin termovızııalyq kamerasy bar dron qoldanylady.

«QazSýShar» RMK Soltústik Qazaqstan oblystyq fılıalynyń dırektory Shuǵaıyp Ibatýllın Prezıdentke Sergeevka sý qoımasy 2022 jyly kópfaktorly tekseristen ótkenin jáne onyń tehnıkalyq jaǵdaıy qanaǵattanarlyq dep baǵalanǵanyn málimdedi. Búginde óńirdegi eki sý qoımasy da shtattyq kestege saı jumys istep tur.

Buǵan deıin habarlaǵanymyzdaı, Memleket basshysy Soltústik Qazaqstan oblysyna jumys saparymen bardy. Qasym-Jomart Toqaevtyń jumys sapary Sergeevka sý qoımasyn, Qyzyljar aýdanyn jáne Petropavl qalasynyń tóńiregin tikushaqpen aralap kórýden bastaldy.