Memleket basshysy Óskemendegi «Lý Ban sheberhanasynyń» jumysymen tanysty
Prezıdentke bilim oshaǵynyń ǵylymı-ınnovatsııalyq ekojúıesi týraly málimet berildi. Rektor Sáýle Rahmetýllınanyń aıtýynsha, byltyr ýnıversıtet bazasynda Smart engineering quzyretter ortalyǵy ashylǵan. Ortalyq mashına jasaý, taý-ken jáne metallýrgııa kesheni salalaryndaǵy ımportty almastyrýshy tehnologııalardy damytýdy kózdeıdi.
Memleket basshysyna jastardyń ınnovatsııalyq jobalar jasaýyna múmkindik beretin medıtsına baǵytyndaǵy tehnoparktiń negizin qalaý jospary jóninde baıandaldy. Qazirdiń ózinde ýnıversıtette ázirlengen 40-tan astam medıtsınalyq ımplantat túri klınıkalyq synyqtan ótkizilip jatyr.
Qazaq-nemis ýnıversıtetimen birlesip, metallýrgııa, paıdaly qazbalardy ıgerý baǵytynda Ǵylym jáne tehnologııa ınstıtýtyn ashý josparlanǵan.
«Lý Ban sheberhanasy» «Avtomobılderdiń ınnovatsııalyq konstrýktsııasy» jáne «Avtomobılderdiń SMART tehnologııasy» sııaqty eki zerthanadan turady. Ortalyqtyń bir ereksheligi – munda stýdentter praktıkalyq daǵdylardy meńgerip, avtomobıl júıelerine sımýlıatsııalyq synaq júrgize alady. Sondaı-aq ortalyqta elektromobılder men gıbrıdti kólikterge tehnıkalyq qyzmet kórsetý jáne dıagnostıka jasaý úshin jańa tehnologııalardy ıgerý isine aıryqsha mán beriledi.
Memleket basshysy jol qozǵalysyn ıntellektýaldy turǵyda uıymdastyrýǵa arnalǵan SMART-ústelmen tanysty.
Prezıdentke gıbrıdti avtomobılderdi, elektromobılderdi jáne olardy qýattaý prıntsıpterin úırenýge arnalǵan oqý stendteri kórsetildi.
Elimizde «Lý Ban sheberhanalaryn» ashý bastamasyn byltyr mamyr aıynda Sıanda ótken «Ortalyq Azııa – Qytaı» sammıtinde Prezıdent Qasym-Jomart Toqaev pen QHR Tóraǵasy Sı Tszınpın kótergen bolatyn.
Ýnıversıtet maqsattarynyń biri – osy «Lý Ban sheberhanasy» bazasynda otandyq avtomobıl qurastyrý ónerkásibi úshin joǵary bilikti tehnıkalyq jáne ınjenerlik kadrlardy daıarlaý.
Ortalyqty aralap kórgen Prezıdent stýdenttermen áńgimelesip, olarǵa tabys tiledi. Sondaı-aq ekonomıkany damytý úshin elimizde «Lý Ban sheberhanasy» sııaqty ortalyqtardyń sanyn kóbeıtý mańyzdy ekenin atap ótti.