Memleket basshysy Nebras Power kompanııasy dırektorlar keńesiniń tóraǵasyn qabyldady

<p>DOHA. KAZINFORM &mdash; &nbsp;Prezıdent Nebras Power kompanııasy dırektorlar keńesiniń tóraǵasy Muhammed Nasser Ál-Hadjrıdi qabyldady, dep habarlaıdy Aqorda.&nbsp;</p>

Kezdesýde jańartylatyn energııa kózderi salasyndaǵy ınvestıtsııalyq yntymaqtastyqtyń perspektıvalary talqylandy.

Foto: Aqorda

Qasym-Jomart Toqaev taıaýda Nebras Power kompanııasy men «Samuryq-Energo» aktsıonerlik qoǵamynyń arasynda Semeı GES-iniń qurylysyna qatysty kelisimge qol qoıylǵanyn quptady. Stantsııanyń qýattylyǵy 300 megavatt bolady. Prezıdent bul jobanyń Astana men Dohanyń uzaqmerzimdi strategııalyq seriktestigin nyǵaıtýdaǵy rólin joǵary baǵalady. Atalǵan bastamany tabysty júzege asyrý úshin Qazaqstan Úkimetiniń jan-jaqty qoldaý kórsetetinin rastady.

Memleket basshysynyń aıtýynsha, elimiz 2030 jylǵa qaraı energııa balansyndaǵy jańartylatyn qýat kózderiniń úlesin 15 paıyzǵa deıin arttyrýǵa nıetti.

Foto: Aqorda

Muhammed Nasser Ál-Hadjrı Qasym-Jomart Toqaevqa birlesken jobany iske asyrýdyń negizgi kezeńderi jóninde málimet berip, «jasyl» energetıka salasyndaǵy Qazaqstannyń áleýeti zor ekenin aıtty.

Aıta ketsek, Qatar astanasy Doha qalasynda 7,8 jeltoqsan kúnderi jahandyq syn-qaterlerdi talqylap, túrli saladaǵy ınnovatsııalyq sheshimderdi izdeýge arnalǵan halyqaralyq forým (Doha Forum) ótedi. Kazinform agenttigi atalǵan is-sharanyń mańyzy týraly sholý usynady.

Buǵan deıin habarlaǵanymyzdaı, Qatar kompanııasy Qashaǵan gazyn óńdeıtin zaýyttyń 75 paıyz aktsııasyn satyp alady.

Búgin memleket basshysy Qatarǵa jumys saparymen bardy.

Prezıdent Power International Holding kompanııasynyń ıeleri Mýataz Ál-Haıat pen Ramez Ál-Haıatty qabyldady.