Memleket basshysy Qostanaı aýdanynyń turǵyndarymen kezdesti
Kezdesýde Qasym-Jomart Toqaev azamattyq belsendilik tanytqan jáne apatqa beı-jaı qaramaı janashyrlyq bildirgen barsha jurtshylyqqa alǵys aıtyp, halyqtyń birligi osyndaı qıyn kezeńde aıqyn kórinetinin atap ótti.
– Men sizdermen júzdesý úshin arnaıy keldim. Jaǵdaıdyń kúrdeli ekenin túsinemin. Memlekettiń barlyq resýrsy osy máseleni sheshýge baǵyttalyp jatyr. Prezıdent retindegi meniń basty mindetim – sý tasqynynan zardap shekken turǵyndarǵa barynsha kómek kórsetý, – dedi Memleket basshysy.Prezıdent memlekettiń qarjysyn qatań únemdeý rejımi engizilgenin, qarajat zardap shekken halyqqa bólinetinin jetkizdi. Memleket basshysy barlyq zardap shekken turǵyndarǵa qajetti kómek kórsetiletinin aıtty.
– Ótemaqy – basty másele. Shyǵyn óteledi. Sonymen qatar turǵyn úıi jaramsyz azamattarǵa jańa baspana salynady jáne jóndeýge jaramdy úıler qaıta qalpyna keltiriledi. Oǵan qajetti barlyq qarajat bólinedi. Kim páterge kóshkisi kelse, biz páter satyp alyp beremiz. Kim óz qonysynda qalǵysy keledi, olarǵa tıptik úlgidegi úıler salamyz. Degenmen qaýipti jerlerde qalýǵa múlde bolmaıdy. Mundaı úılerdiń jobasy bar. Bul úıler qysqa deıin tolyqtaı salynady. Men Úkimetke aldaǵy jaz mezgilinde, sondaı-aq kúzde barlyq qurylys jumystaryn bitirý jáne apat saldaryn tolyq joıý jóninde mindet júktedim, – dedi Prezıdent.
Memleket basshysy sý tasqynynyń saldaryn eńserý úshin ár aımaqqa eldiń iri kásipkerleri bekitiletinin atap ótti.
Óz kezeginde turǵyndar sý tasqynynyń zardaptaryn joıýǵa jedel kómek kórsetilip, qutqarý jumystarynyń ýaqytyly júrgizilgeni úshin alǵystaryn bildirdi. Olardyń aıtýynsha, bul apat halyqtyń birligin aıqyn kórsetti. Tabıǵat apatynyń alǵashqy kúnderinen bastap eriktiler, memlekettik qyzmetshiler, quqyq qorǵaý organdary men Tótenshe jaǵdaılar mınıstrliginiń qyzmetkerleri, jalpy janashyr adamdardyń barlyǵy jan-jaqty kómek kórsetýge umtylǵan.
Kezdesý sońynda Memleket basshysy kelesi jyly Alash ardaqtysy Mirjaqyp Dýlatovtyń 140 jyldyǵyna arnalǵan is-sharaǵa qatysý úshin Arqalyq qalasyna barýdy josparlap otyrǵanyn jetkizdi.
Buǵan deıin habarlaǵanymyzdaı, Memleket basshysy Soltústik Qazaqstan oblysyna jumys saparymen bardy. Qasym-Jomart Toqaevtyń jumys sapary Sergeevka sý qoımasyn, Qyzyljar aýdanyn jáne Petropavl qalasynyń tóńiregin tikushaqpen aralap kórýden bastaldy. Sondaı-aq Prezıdent Petropavl sý torabynda boldy.
Búgin sondaı-aq memleket basshysy sapar barysynda tabıǵı apatpen kúresip júrgen azamattarǵa alǵys aıtqanyn jazǵan bolatynbyz.
Soltústik Qazaqstan oblysynan keıin Prezıdent borty Qostanaı oblysyna ushyp barǵanyn da habarlaǵan edik. Memleket basshysy Qostanaı oblysyndaǵy sý tasqynyna baılanysty jaǵdaımen tanysqan bolatyn.