Memleket basshysy Qytaıda «Bir beldeý, bir jol» halyqaralyq yntymaqtastyǵy III forýmynyń ashylý rásimine qatysty
Memleket basshysy dástúrli qonaqjaılyǵy men forýmdy minsiz uıymdastyrǵany úshin QHR Tóraǵasy Sı Tszınpınge alǵys aıtty.
Qasym-Jomart Toqaev óz sózinde Qytaıdyń jahandyq qaýipsizdikti qamtamasyz etý isindegi sheshýshi róline nazar aýdaryp, ony ekonomıkalyq jáne tehnologııalyq damýdyń lokomotıvi retinde atap ótti.
«Qazirgi geosaıası jaǵdaıda «Bir beldeý, bir jol» bastamasy qajetti halyqaralyq jobaǵa jáne yntymaqtastyqtyń iri platformasyna aınaldy. Bul joba Qytaıdyń ekonomıkalyq qýatyn, sondaı-aq onyń jahandyq deńgeıdegi jańa belesterdi baǵyndyrýǵa umtylysyn kórsetedi. Osydan on jyl buryn Siz Qazaqstanda alǵash ret «Bir beldeý, bir jol» uzaqmerzimdi bastamasyn usynyp, onyń basty qozǵaýshy kúshi boldyńyz. Munyń sımvoldyq máni zor. Osy mańyzdy mereıtoıdy atap óte otyryp, búginde Sizdiń bastamańyz óziniń qajettiligin kórsetti jáne álemdik qoǵamdastyq tarapynan moıyndalyp, jahandyq aýqymdaǵy úlken jobaǵa aınaldy dep senimdi túrde aıta alamyz», – dedi Prezıdent.
Memleket basshysy «Bir beldeý, bir jol» jobasynyń teńdessiz ári aýqymdy halyqaralyq yntymaqtastyq úshin pármendi platformaǵa aınalǵanyna toqtaldy.
«Osy jobaǵa qatysýshy memleketterdiń bastamalary arqasynda Azııa, Eýropa jáne Afrıkanyń 150-den astam eli taram-taram temirjoldar jelisi, joǵary jyldamdyqty kúre joldar jáne teńiz joldary arqyly baılanys jasap otyr. Bul joba álem ekonomıkasynyń jyldam qubylyp turǵan jaǵdaıynda qazirgi zamannyń asa kúrdeli syn-qaterlerine tıimdi tótep bere alatyn jáne memleketterimiz úshin jalpyǵa ortaq ıgilikke aınaldy», – dedi Qasym-Jomart Toqaev.