Memleket basshysy QHR Qorǵanys mınıstri Dýn Tszıýndi qabyldady

<p>ASTANA. KAZINFORM - Qasym-Jomart Toqaev Qazaqstanǵa resmı saparmen kelgen Qytaı Halyq Respýblıkasynyń Qorǵanys mınıstri Dýn Tszıýnge iltıpat bildire otyryp, onyń tatý kórshilik, dostyq qatynastardy jáne ózara tıimdi yntymaqtastyqty nyǵaıtýǵa qosqan úlesin erekshe atap ótti, dep habarlaıdy Aqordanyń baspasóz qyzmeti.&nbsp;</p>

Prezıdent qazaq-qytaı baılanystary joǵary deńgeıde ekenine, ıaǵnı arada máńgilik ári jan-jaqty strategııalyq seriktestik ornaǵanyna nazar aýdardy.

Foto: Aqorda

Memleket basshysynyń pikirinshe, kópjaqty qurylymdar aıasynda Qazaqstan men Qytaıdyń óńirlik jáne halyqaralyq qaýipsizdiktiń negizgi máselelerine qatysty kózqarastary uqsas.

– Biz Birikken Ulttar Uıymy, Shanhaı yntymaqtastyq uıymy, Azııadaǵy ózara is-qımyl jáne senim sharalary jónindegi keńes sheńberinde konstrýktıvti dıalog quryp, bir-birimizge qoldaý bildirip kelemiz. Sondaı-aq Qytaıdyń dúnıejúzilik damýǵa, jahandyq qaýipsizdik pen órkenıetke qatysty usynǵan bastamalaryn joǵary baǵalaımyz ári qoldaımyz. Bul bastamalar álemdegi qaýipsizdiktiń qazirgi júıesin nyǵaıtýǵa oń úles qosady dep sanaımyn, – dedi Prezıdent.

Óz kezeginde QHR Qorǵanys mınıstri Dýn Tszıýn qonaqjaılyq kórsetkeni úshin Memleket basshysyna alǵys aıtyp, ShYU-ǵa múshe elderdiń qorǵanys mınıstrleriniń keńesi joǵary deńgeıde ótkenin atap ótti.

Foto: Aqorda

Áńgimelesý barysynda taraptar bitimgerlik, bilim jáne áskerı-tehnıka salalaryndaǵy yntymaqtastyqty damytýǵa nıetti ekenin jetkizdi.